Manipur BJP MLA-te New Delhi aṭangin Imphal-ah kir

Manipur-a BJP MLA ṭhenkhat, kar liam taa New Delhi-a Manipur-a sorkar thar din leh tura sorkar laipui hruaitute hnena ngenna thlentute chu Inrinni khan Imphal-ah kir lehin, an thil phut leh an thu thlente ngaih pawimawh sakin, tihhlawhtlin sak an ni thuai dawn tih an sawi.

MLA-te chuan sorkar laipui hruaitute chuan kumin kum tir aṭanga President’s Rule hnuaia awm, Manipur-a mipui aiawhten sorkar thar an siam theihna turin beiseiawm a awm tih an sawi bawk.

MLA Karam Shyam chuan hun danga inbiakna an lo neih tawh ṭhin aiin, tun ṭuma an inbiaknaah sorkar laipui hruaitute lam aṭangin thu an dawn chu a lawmawm tih a sawi. Tun hnaia inbiakna an neih ṭhinah mipui sorkar thar din chungchang sawilan a tlem hle a, tunah erawh chuan sorkar thar din thuai theih an beisei tih BJP North East in-charge Sambit Patra leh party general secretary B.L. Santosh chuan a tarlang.

Delhi-a kal zinga mi, MLA Sapam Ranjan Singh pawhin state aiawha New Delhi-a kalte thil tum ber chu Manipur dinhmun sorkar laipui hruaitute hriattir a, mipui thlan sorkar siam thuai tura nawr a ni, a ti. Mipui rintlak sorkar din pawimawhnate sawilangin, thu lawmawm an dawn thuai a beisei tih a sawi ve bawk.