Assam: Guwahati air show neih turah Rajnath Singh-a'n telpui dawn

Guwahati, Assam-a Lachit Ghat, Brahmaputra lui dunga November 9-a Indian Air Force (IAF) Air Show neih turah union defence minister Rajnath Singh a tel dawn tih chief minister Himanta Biswa Sarma chuan a sawi. Air Show-ah hian aircraft 150 vel pholan a ni dawn a, chung zingah chuan Rafale, Sukhoi leh MiG fighter jet-te pawh an tel dawn.

Air Show an neih tur hi hmarchhak biala IAF Air Force Day lawmna peng pakhat niin, helai biala aircraft lian an pholanna hmasa ber tur a ni. An hun hman tur thupui atan, 'Infallible, Impervious and Precise' tih hman a ni ang.

He huna thlawhtheihna chi hrang hrang an pholan turte hi frontline fighter jet, transport plane, leh helicopter- te an ni. Mipuiten IAF-in technology lama hmasawnna an neih leh, an thiamthil an phochhuahte an thlir thei dawn a ni. Official-te chuan Air Show hmang hian ram puma aerial power pho chhuah bakah, hmarchhak bial ṭhalaite rilrua sipai nih chakna nei tura fuih an tum thu an sawi.

Union Defence Minister-in Assam a tlawh hmain, union finance minister Nirmala Sitharaman chuan November 7 leh 8 hian infrastructure project pawimawh tak tak a hawng dawn bawk a, hawn tur zingah hian Guwahati Gateway Terminal leh Guwahati Riverfront Project-te an tel. Gohpur-a Swahid Kanaklata Barua State University lungphum a phum bawk dawn a ni.