Manipur : Governor-in Loktak Hydroelectric Project leh Tourism Permit siamṭhat ennawn

Manipur governor Ajay Kumar Bhalla chuan October 7 khan Raj Bhavan-ah meeting kaihruaiin, state power leh tourism sector-a thil pawimawh hrang hrang ennawn a ni.

Meeting-ah hian NHPC Ltd. leh Indian Association of Tour Operators (IATO) official-te an tel a, Loktak Hydroelectric Project kalpui dan tur leh, rampawn aṭanga state tlawhtu khualzinte tana zin veivah tih awlsamna tur chungchang sawi ho a ni.

NHPC Ltd. head of project leh general manager (Electrical), Gursharan Singh chuan Loktak Hydroelectric Project siamṭhat leh tihchangtlunna tura hmanraw lian tham phurh kawnga harsatna awmte Governor hnenah a hrilh. Governor Bhalla chuan harsatna an tawhte ngaihthlak sakin, state-a power supply bahhlah awm loa siamṭhat hna thawh zawh thuai a ṭul tih a sawi.

Governor chuan Loktak project chuan helai biala energy mamawh phuhruk kawngah hmun pawimawh tak a chang tih sawiin, harsatna awmte chingfel turin department hrang hrang thawh hona ṭha zawk neih a ṭul thu a tarlang bawk.

Hemi ni vek hian IATO Manipur-a state-in-Charge, H. Radhakrishna Sharma leh a team-te chuan rampawn aṭanga state tlawhtuten Protected Area Permit (PAP) lak kawnga harsatna awmte sawipui turin Governor hi an hmu. Team hian ruahmanna an siamte tarlangin, chung zingah chuan khualzinten an rama an awm laia PAP dil phalsak, tour operator leh IATO member-ten an client aiawha permit dil theihna tur thuneihna pek te a tel a ni.