Arunachal Pradesh : CM-in Reverse Buyer-Seller Meet hawng

Arunachal Pradesh chief minister Pema Khandu chuan nimin khan Itanagar-ah ni hnih awh tur, Reverse Buyer-Seller Meet (RBSM) a hawng.

RSBS meet hi Indian Chamber of Commerce (ICC) leh Trade and Commerce department bakah state sorkar thawh honaa buatsaih niin, ram chhung leh ram pawn aṭanga tualchhunga thil siam chhuaktu, thawn chhuaktu, investor leh a leituten inpawhna ṭha an neih theihna tura duan a ni.

Hawnna inkhawma thu a sawiah, CM Khandu chuan ICC-in kum 100 tlin lawmna an hmang thei chu lawmawm a tih thu sawiin, Arunachal Pradesh chu organic, natural, leh value-based product siamna hmunpui a nih theihna tura state sorkar nen thawh hona an nei chu lawmawm a tih thu a sawi bawk. Meet chu insumdawnna mai ni loin, loneitu, kut hnathawktu, leh entrepreneur-te tana ram chhung leh khawvel pum market-a inphochhuah theihna tur platform ṭha tak a ni, a ti.

Khandu chuan ram pawna thawn theih thil hriat chhuah, agri-infrastructure tihchangtlunna tur leh international branding tihhmasawnna tura agency hrang hrang zingah APEDA nen an thawh honaa an hmalakna eng emaw zat a tarlang. Kum sawm liam ta chhunga intlawhpawhna ṭha zawk- kawng, rel, thlawhtheihna, leh digital-te chuan tualchhung thil thawn chhuah kawngah nasa takin a pui tih sawiin, prime minister Narendra Modi sorkarin a thlawp avangin lawmthu a sawi bawk.