December 30 zan dar 7:45 vel khan State Bank Main Branch bul, Mahatma Gandhi-a lim leh Transport Office hlui inkarah bike leh car a insu a, bike-a chuang, Linda Lalduhsaki, kum 19, ITI Veng chu a thi. Traffic Police-te sawi danin, Maruti 800, MZ 01 B 9199 chu chhim lam atanga hmar lam panin Transport Office hlui leh Mahatma Gandhi lim bula kawng kualah a hma-a car tlan chu a lehpel a, hmar lam atanga chhim lam pan, bike, MZ 01 B 3625 nen an insu ta a ni. Traffic Police-te chuan bike khalhtu, Samuel Lalnunmawia, kum 21, Tuikual South pawh a na hle tih an sawi a, car hi Lalngaihawma, kum 19, Bethlehem Vengthlang khalh a ni a, Traffic Police-ten thubuai an siamsak nghal a ni.
December 31 chawhnu dar 1:30 vel pawh khan Edenthar-a DTO Office bulah Tanker leh Bike a insu a, bike khalhtu, Laltlanzuala, kum 16, Vaivakawn chu a thi. Bike (MZ 01 D 9813) hi Bawngkawn lam pana tlan a ni a, Bike-a chuang, Zoramthanga, Zemabawk pawh a na hle. Traffic Police-te chuan Aizawl khawpui chhunga lirthei chetsualna tam ber chu tlan chak vang niin an sawi a, hei bakah hian kawng kuala mi dang lehpelh vang leh mahni side-a tlan loh vang a ni bawk tih an sawi a, hei vang hian lirthei khalhtute chu fimkhur turin an chah a ni.
December 31 vek khan Rangvamualah Pioneer Truck leh Bike a insut avangin Bike-a chuang mi 2 an hliam. Bike-a chuangte hi Lalhmachhuana, kum 19 leh a mi phurh Lalthapuii, kum 19 mi, Ramhlun North ve ve an ni a, Vaivakawn Police Station atanga thu dawn danin, hliamte hi Aizawl Civil Hospital-ah thawn nghal an ni a, an hliam na lutuk lo thung. Police-te chuan he chetsualna hi Bike-in Pioneer motor lehpelh a tum laia thleng niin an sawi a ni.
Bike chesualah mi 2 thi
