Tui pump khawlsa pawh paih vek: November 2, Thawhtanni khan Aizawl khawpui châwm nana PHE-in Tlawng tui an pump-na hnár, Serlui-ah mi tu tih hriat lohte’n túr hmangin luia cheng nungchate an hrâi a, hei vang hian Tuikhuahtlanga tui pump khawlsa zawng zawng te, Dihmunzawla pump khawlsa te, zonal tanky hrang hranga sem darh tawhte leh Tlawng lui bula tuizem liana tui tihthianghlim turte chu paih leh vek an ni. Hei vang hian Aizawl khawpuiah ni hnih/thum vel chu tui a harsat phah dawn tih PHE hotute chuan an sawi.
Serluiah túr phul a nih tih an hriat veleh PHE Aizawl Watson Circle-a Superintending Engineer, Lalhmachhuana hoin, EE Pahminga, EE H Duhkima leh PHE department-a tui thianghlim leh thianghlim loh enfiahtu Chief Chemist, C Dorema te chuan Thawhtanni zanlai thleng khan tui an pump tawh leh lui luanga tuite chu hmanraw famkim nen an endik a; police-te pawh Forensic expert-te nen an che nghal bawk.
Túr hmanga tui tihbawlhhlawh tam tak chu Tuikhuahtlangah eng emaw zat pump hman a ni a, tui pump sate chu nimin khan paih leh vek a nih bakah, zonal tanky hrang hranga sem darh tawhte pawh paih leh vek a ni. Lalhmachhuana sawi danin, Tuikhuahtlang tanky-a tui an paih hi litre nuai 16 vel a ni a, Dihmunzawla an paih nen suma chantir chuan cheng nuai 16 vel man a ni.
Túra Serlui hrai vanga sum hloh zawng zawng hi chhût theih a ni lo a, tui pump tawhna diesel man te, Tuikhuahtlanga la thleng si lo, Dihmunzawla pump khawl tawh ringawt man pawh cheng nuai chuang fé man a ni. SE Lalhmachhuana chuan, Tlawng tui chu a him tâwk tih hriat chian a nih hnuah chauh an pump leh tur thu a sawi rualin, vawiin lam hian pump theih an inbeisei thu a sawi a. Tui pump sa eng emaw zat paih a nih avang leh, ni hnih vel tui pump a khaihlak avang hian veng hrang hranga tui sem dan kal pangngai pawh hun eng emaw chen a nghawng dawn tih a sawi.