Zirtirtute Ni, September 5 khan Pre­sident Pratibha Patil chuan ramchhunga zirtirtu hnathawk tha thlan chhuahte hnenah chawimawina a hlan. Lawmman hlanna inkhawm hi New Delhi-a Vigyan Bhawan-ah buatsaih a ni. 

Prime Minister Manmohan Singh pawhin Inrinni khan chawimawina dawngtu tur, zirtirute pual hian thuchah a lo sawi tawh a, hetah hian zirlai naupangte chu eng  hnam pawh, hmeichhia emaw, mipa emaw pawh ni se, ramchhunga zirna inte chu an hlauh leh kal hrehna hmun nilo tura siam a pawimawh tih a sawi. 

PM chuan, 'Zirtirtu hna chu hna zahawm tia sawi a ni thin. Kei pawh zirtirtu hna ka thawh lai hun kha ka hun ka hman that leh lungawithlak ber hunlai a ni' a ti. Zirlai naupangte hremna na tak pek an nih chungchang sawichhuakin, Manmohan Singh chuan Right to Education (RTE) hman mek angin, school leh a chhehvel boruak chu zirlaite tan hlauhna, an rilru tihnual thei thil laka a fihlim a ngai a ni, a ti.

'RTE chuan zirlaite kutthlak leh an rilru tihnual  thei zawnga hremna pek a khap a, hei bakah hian hremna atana zirlaite awm khawtlai tir leh hnawhchhuahte pawh a khap bawk. He dan hi zirtirtu tam takin an sawisel a, engtinge discipline kenkawh a nih theih ang tiin an zawt a, mahse he dan hmanga zirlaite kaihhruai chu zirtirtute mawhphurhna  a ni' tiin PM chuan a sawi.

Moaist helhoin security force mi pathum an kawl mekte tlanna tura Bihar jail-a tang mek, an mi leh sate chhuah zalen tura sorkar hnena hun a tiam chu nimin chawhma dar 10 khan a tawp ta.

Anti-Naxal opertion Inspector General, KS Dwivedi chuan Pathiannia Lakhisari district atanga helhoin an rukbo, police-te chhanchhuah ngei tumin CRPF Cobra Battalion, CMP, STF leh SAP tangrualten Dharhara, Kajra ramhnuaiahte leh Munger, Jamui leh Lakhisarai district-a hmun hrang hrangah beihpui thlak mek tih a sawi.

Dwivedi chuan Maoist helhoin Kajra ramhnuaia a ruang an paih nia an sawi, sub inspector Abhay Yadav ruang chu Abhay Yadav ruang niloin, helho rukbo police pali  zinga mi tho, havildar Lucas Tete a nih thu Deputy Inspector General of Munger Shah Rukh Majeed  chuan a sawi. A ruang chungah hian helho chuan lehkha dahin, an mihren dangte pawh tihhlum an ni dawn tih thu an lo dah a ni.

Hetihlai hian Maoist thupuantu, Avinash inti chuan nimin khan telephone-in media mite a bia a, Manikpur Station House Officer, Abhay Yadav an tihlhum thu hi a hrilh a, Bihar jail hrang hranga tang mek, Maoist mi leh sa pariatte chhuah zalenna tura sorkar nena inbiakna neih chu duh thu a sawi. Avinash chuan, 'Mihring tihhlum chu a tha lo tih kan hria a, mahse thlan tur dang kan nei lo a ni.

Sorkar chuan inbiakna neih a duh chuan, kan hmalaknate chu chawlhsanin inbiakna nei turin kawng kan hawng ang' a ti. Sorkarin an thilphut a pawm loh chuan police pathum an la kawlte pawh an tihlum vek dawn niin an sawi.

Bihar Chief Minister, Nitish Kumar chuan Moaist nena inbiakna neih a duh thu hi Ningani khan a lo sawi tawh a, jail-a tang mek Maoist mi leh state chu sorkar chuan tha takin a enkawl niina  sawi bawk.

Prime Minister Manmohan Singh chuan Tirupati bula Rs vaibelchhe 6,000 senga power equipment manufacturing plant siamna tur lungphum chu Nilaini khan a phum.

PM chuan power hnianghnar neih chu industry leh agriculture lama hmasawnna tura thil pawimawh a nih thu sawiin, hei hi ram economy thanna tur atana neih ngei ngai a ni, a ti.

India hian power MW nuai 1.62 siam chhuah theihna a nei a, hetihlai hian power lama indaihlohna chu 13-14% vel a la tling a ni.

Sorkar laipui chuan 11th Plan Period tawp hun, March 2012 hian power siamchhuah sa bakah MW 78,000 siamchhuah belh a tum a ni.

Power plant thar, NTPC BHEL Power Projects Pvt Ltd (NBPPL) hi kum 2014-15 chhunga zawhfel hman tura ruahman niin, power MW 5,000 a siamchhuak thei dawn niin Singh chuan a sawi.

NBPPL enkawl hna hi NTPC Ltd leh Bharat Heavy Electricals Ltd (BHEL)-ten 50:50 in an thawk dawn a ni. Singh chuan company pahnihte chu tawnhriat ngah tak an nih avangin an thawkdun tur chu thil lawmawm tak a nih thu sawiin, direct-in mi 6,000 leh indirect-in mi 25,000 vel tan hnathawh tur an siamsak thei dawn a ni, a ti.

Rajya Sabha chuan Thawhlehni khan MP-te hlawh, a let thuma tihsanna tur bill, The Salary, Allowance and Pension of Members of Parliament (Amendment) Bill, 2010chu a pass ta. He bill hi Lok Sabha-ah pass a lo ni tawh bawk.

Bill pass a nih tak avangn MP-te hian an thla khat hlawh, Rs 16,000 ni thin chu Rs 50,000 an la tawh dawn a, hei bakan hian an allowance pawh a letin tihpun a ni bawk.

Rajya Sabha-a bill pass a nih hma hian debate neih hmasak a ni a, hetah hian member-te chuan MP-te hlawh chungchanga thutlukna siam tur independent body din phut a ni. Sawihonaah hian meber 10 vel an ding a, eptu hruaitu Aruj Jaitley-an independent body din  rawtna chu member dangte pawhin an thlawp hle.

Parliamentary Affairs Minister, Pwan Kumar Bansal chuan, 'Member-te hlawh leh pension chungchanga thutlukna siamtu tur din chu thil tul tak a ni. Mahse hei hi zau zawka sawiho a ngai a ni' a ti.

Joint Committee on Salaries and Allowance of MP, Congress member Charandas Mahant kaihhruai chuan MP-te hlawh chu Rs 16,000 atangin Rs 80,001, Secretary to the Government of India hlawh aia cheng khata tama siam turin rawtna a siam a ni. Mahse Bansal chuan MP leh sorkar hnathawk, an pension hma kum 30 chhung zet sorkar hna lo thawkte chu khaikhin theih an ni lo tih a sawi.

Maoist helpawlte chuan nimin khan Bihar sorkar tana hriattirna tichhuakin, an mi leh sa jail-a tang mekte chu Nilaini-ah chhuah vek turin an hriattir.

Maoist-te chuan sorkar hnena hriattirna an pek chu tihhlawhtlin a nih loh chuan Lakhisarai district atanga security force mi leh sa 4 an rukbo-te chu an tihlum nghal dawn tih an sawi.

Avinash chuan, 'Bihar jail-ah kan commander pariat an tang mek a, heng mite hi chhuah kan nih loh chuan police pali kan kuta awm mekte hi kan that dawn a ni. Pathianni khan Bihar Military Police (BMP) jawan pahnih leh sub-inspector pahnihte hi kan man a ni' a ti.
'Bihar sorkar hnenah kan commander-te hi Nilaini tlai dar 4 hma ngeia chhuah zalen turin kan ngen a ni'  a ti.

Pathianni khan helho leh security force 11-te chu Laskhisarai district-ah Poona-Dih khuaah an inbei a, police 7 thiin midang 4-te chu an chin hriat hriat lohin an awm a, heng mite hi an kawl niin Moaist helho hian an sawi a ni. Police-te kut atang hian helho hian ralthuam eng emaw zat an laksak bawk.

Nimina Parliament in hniha rorel inkhawm chu eptu pawl, BJP-ten sorkar laipui chu CBI dik lo taka hmangah an puh avangin chawhnu thlengin inkhawm tihtawp a ngaih phah a ni.

Lok Sabha rorel inkhawm tan hnu  lawkah, eptu hruaitu Sushma Swaraj chuan sorkar laipui chu 'dan laka inhumhimna leh, midangte phihawhna hmanrua atan' CBI a hmang niin a puh a, hei hi Parliamentary Affairs Minister Pawan Kumar Bansal chuan na takin a lo hnial let a ni.

Swaraj-i chuan So­hrabuddin tualthah thubuai kaihhnawihah thu an zawhfiahnaah,  Gujarat senior IPS officre Geeta Johri chuan political hruaitu thenkhatte hming sawilang turin CBI chuan a nawr nia report a pek thu sawiin, hei hian sorkarin a thuneihna hmangin CBI chu hman tangkai a tumzia a tilang a ni, a ti.

Rajya Sabha inkhawmah pawh BJP member-te chuan hetiang bawk hian sorkar laipui chu an bei a, Minister of State for Parliamentary Affairs Prithviraj Chavan chuan sorkar chu CBI hnathawh dan sawiho turin a inpeih reng thuin a lo chhang a ni.

Parliament  in  hnihah hian BJP member-te hian lungawiloa an aubuai chhunzawm avangin chawhnu thlengin inkhawm hi tihtawp lailawk a ni ta a ni. Swaraj-i chuan Parliament session neih mek chu CBI hnathawh dan leh a nihnate sawihona turin ni khata pawtsei turin sorkar laipui chu a phut thu a sawi. 'He session hi CBI chungchang sawi lo chuan tihtawp a ni tur  ani lo. Political lama inhaivur tumna atana dik lo taka CBI hman thin hi tihtawp a ngai a ni' a ti.

Chhattisgarh-a Kanker dis­trict-ah nimin zing khan Naxal helhoin security force-te lo changin an lo bei a, panga an kaphlum. An zingah pathum chu BSF jawan an ni.

BSF leh district police-te hi Durg Kondal police station hnuaia Bhuski khuaah beihpui an thlak a, hei hi helho hian lo changin an bei ta a ni. Security force-te hian an kaplet nghal a ni. Kanker SP Ajay Yadav chuan helho bei tur hian security force mi tirh belh an nih thu a sawi.

Sorkar  laipui chuan Maoist hel sorkar kuta an ralthuam nena inpete chu lawmman, tangka fai thahnem tawk tak pek an ni ang,a  ti. Hei bakah hian Maoist hel hluarna state hrang hrangte chu kum khat kaltaa Naxal hel, ralthuam nena inpete Rs nuai 2 zel pek an ni ang tih policy lo duan tawh zulzuia policy siam turin a ngen bawk.

Sorkar laipui policy hnuaiah hian  Naxal hel inpete chu Rs nuai 1.5 pek nghal an ni a, hemi hnu kum thum chhung, vocational training an neih chhung chu stipend atan thla tin Rs 3,000 pek an ni bawk. Hei bakah hian an ralthuam pekluh azirin hamthatna dang pek an ni bawk a ni. Rs nuai 1.5 hi bank-ah anmahni hmingin fixed deposit-a dahsak nghal an ni a, training an neih zawhah an pawisa hi an lachhuak leh thei dawn a ni.

Home Ministry chuan hel inpeten ralthuam an pekluh dan azirin pawisa pek tur a duang a, AK-47 or AK-56 or AK-74 rifle pakhatah Rs 15,000 pein, RPG emaw, sniper rifle pakhatah Rs 25,000, pistol/revolver pakhat Rs 3,000, rocket pakhatah Rs 1,000, SAM missile pakhatah Rs 20,000, satellite phone pe lut hnenah Rs 10,000, IED-ah Rs 1,000 leh remote control device pe lut hnenah Rs 3,000 pek an ni.

Rashtirya Lok Dal (RLD) kaihhruaiin, nimin khan Yamuna Expressway relkawng atana ram lak chungchanga lungawilohna lantirin, loneitute chuan New Delhi-ah rally an huaihawt.

Loneitute hian Yamuna Ex­press­­way tana an ram laksakah zangnadawmna tha zawk pek an phut a, sorkar laipui chu Land Acquisition Act siamthat turin an phut bawk.

RLD hotu, Ajig  Singh chuan Ram Lila Maidan atanga kawngzawh hi kaihhruaiin, Parliament thlenga zawh an tum a ni. Nimina kawngzawhah hian Uttar Pradesh atangin loneitute mi 10,000-20,000 vel an tel nia sawi a ni. Loneitute hian kar hmasaa  nawrh an  huaihawtnaa police-te silai hmehpuah avanga loneitu pathumte an thihphah avanga an lungawilohna an lantir nghal bawk a ni.

Loneitu pawl, Bhartiya Kisian Union (BKU), Mahindra Singh Tikait kaihhruai chuan RLD-ten Parliament thlenga kawng an zawh tum hi an zawm ve dawn lo a ni. Mahse BKU chuan loneitute hamthatna leh chanvo venhimna turin Land Acquisitio Act, 1894 chu siamthat an phut a ni. Eptu party liante chuan loneituten lungawilohna lantir an tum hi an thlawp thu an sawi.

Hetihlai hian Uttar Pradesh Congress  incharge, Digvijaya Singh chuan loneitute chuan lungawilohna lantira kawng an zawh chu Parliament niloin, state Assembly lamah an lantir zawk tur a ni,a ti. Singh chuan UP-a loneitute nawrh an huaihawt tumin, vantlang mipuite harsatna thlen zawngin an awm lo tiin an lo sawi tawh a ni, a ti.