Information & Communi­cation Technology (ICT) de­partment-a Web Content Developer pahnih - KC Rothang­liana, Laipuitlang leh, K Lalawmpuia, Electric Veng te chuan ICT department hawn a nih hnu lawkah educational mark­sheet leh certificate lem hmangin ICT-ah hian hna an hmu. Hemi chungchangah hian complaint a awm avangin bân tuma tih an ni a, bàn a nih loh nan ICT department chuan hma an la mek nia thu dawn a ni.

Vanglaini chuan nikum June thla khan RTI Act hmangin ICT department-ah hian thawktute hming, an luh hun, qualification, pay scale leh thil dangte a dil. Hei hi kimchang lo taka an chhân a nih avangin Vanglaini chuan a dil nawn leh a, kimchang takin an educational marksheet/certificate photo copy-te nen vek an pe chhuak ta a ni.

Vanglaini-in document a neiha marksheet/certificate-a a lan danin, KC Rothangliana hian kum zâwnin pawl 10 leh 12 a pass tih hmuh a ni (kum 2001-ah pawl 10 leh 2002-ah pawl 12).

Kumin tìr lam khan mi pakhat­in KC Rothangliana chung­chang­ah hian ICT department-ah complaint a thehlut a, refe­rence atan Vanglaini-in RTI Act hmanga document a dilchhuah a hmang. Hemi hnu hian department lam chuan a chungchang hi a ngaihtuah zui ta a ni. Document lem hman chungchang hi ICT Minister leh Secretary-te pawhin an hria a, an bawhzui bawk  a ni.

Pawl 12 marksheet/certificate bakah hian, Bachelor of Com­puter Application (BCA) certificate/marksheet-te pawh a lem nia hriat a ni a, a zir chhuahna nia lang, Osmania University pawh zawhfiah a ni a; Osmania lam chuan KC Rothangliana hi BCA marksheet/certificate an pek chhuah loh thuin an lo chhang nia thu dawn a ni.

K Lalawmpuia pawhin BCA Certificate (Osmania University) a hmang tih hriat chhuah a ni a, mahse ani hi chuan kumin June khan correspndence-in BCA hi a zo thung. KC Rothangliana leh K Lalawmpuia te BCA certificate hi a lem tih finfiah a ni tih thudawnna chuan a sawi.

Educational document lem a hmang ngei tih finfiah a nih hnuah pawh tun thlengin document lem hmangtute hi bàn a la ni lo. Thudawn danin, ICT department-a Computer Operator lâk tum mek a ni a, nimin khan DPC pawh an thu a, hetah hian KC Rothangliana chungchang pawh ngaihtuah a ni. Tuna ICT-a Computer Operator lak turah hian advertisement chhuah a ni lo niin thu dawnna chuan a sawi.

ICT department chuan Com­puter Operator lâk tum mekah hian KC Rothangliana chu dah leh tumin hma an la a; KC Rothangliana hian PGDCA certificate a nei bawk a, mahse PGDCA hi pawl 10 chauh pass tan zir theih a ni lo nia thudawn a ni.

India ram pum huapa lemziak leh art chi hrang hranga tui mite fuankhawmna hun, National Art Festival vawi 8-na chu nimin khan Tourist Lodge, Chaltlangah tan a ni a, Governor MM Lakhera-in a hawng. He hun hi Lalit Kala Akademi, New Delhi leh Mizo­ram Art & Culture department buatsaih a ni a, a hawnna hun hi Art & Culture Minister PC Zoram Sangliana pawhin a hmanpui.

Governor chuan, India ram mi vek ni si, India ram rila mite leh hmarchhak mite an inhre pawh tawn lo chu a vei thu sawiin, "Inpumkhatna tha zawk nei turin inhmuh tam leh thil tihho uar a pawimawh a ni," a ti a; hnam ziaráng inhriatsak tawnna atan art chu hmanraw pawimawh tak a ni tih a sawi.

Khualzahawm PC Zoram Sangliana chuan, Mizorama India ram pum huap Art Festival nghah a ni chu Mizoram tan bung thar a nih thu sawiin, "Art lama tui mite leh Mizorama visual art chawikanna tura theihtawp chhuahtu, artist tlemtête thawh rah a ni," a ti.

National Art Festival hi kar khat chhung awh tur a ni a, state dang atangin artist pahnih theuh telin, Mizoram atangin pali an tel. Hawnna inkhawm hi Lalit Kala Akademi Regional Centre Con­sultant, Dr US Tiwari-in a kaihruai a; Indian classical dancer, Kavita Dwibedi leh mi dang ten zai leh lam chi hrang hrang an entir a ni.

Mizoram chhunga Autonomous District Council pathumte'n, sorkar laipuia Mizoram sorkar kaltlang loa sum hmuh (direct funding) an dil chungchang zir chiangtu committee chuan, direct funding hi Mizoram sorkar pawhin pek a remti niin report-ah an tarlang nia thudawn a ni.

Thudawn danin, Home Minister P Chidambaram-in kumina Mizoram a rawn tlawh khan District Council aiawhte'n an lo hmu a, direct funding chungchang an lo sawipui a ni. Chidambaram hian Delhi a thlen hnuah hemi chungchang zir chiang turin commitee a din a; Committee chuan report an thehluh hnuah, Ministry of Home Affairs chuan Mizoram sorkara District Council Affairs department chu report atangin sawi belh duh an neih leh neih loh a rawn zâwt a ni.

Committee report-ah chuan, District Council-te hnena direct funding pek chu dan anga a rem lohna an hmuh loh thu tarlan a ni a; Mizoram sorkar pawhin a remti, tih an tarlang tel niin thudawnna chuan a sawi.

District Council Affairs department chuan, District Council-te direct funding pek an niha a kaihhnawih tur department-te chu sawi duh an neihte a zawt mek a; chhanna an dawn hunah sorkar laipuiah an thawn ve leh dawn a ni. Thudawnna chuan, Mizoram sorkar chhanna azirin District Council-te hi direct funding pek an ni mai thei, a ti.

Chhingchhip Mual­pui Congress kaihhruai V/C chu tun hnai khan thiah a ni a, hei vang hian mi thenkhat chuan nimin khan an bialtu MLA, K Lianzuala lim an hâl.

LAD Minister, PC Lalthanliana chuan, Chhingchhip Mualpui V/C thiah chhan chu sum hmang dik loa puh an nih vang a ni, tiin Vanglaini a hrilh. Chhingchhip Mualpui V/C thiah chungchangah hian bialtu MLA-in engmah sawi a neih loh thu leh, MLA thupeka
thiah theih a nih loh thu sawiin, LAD Minister chuan, "Eng party pawh ni se, V/C hnathawk tha lo chu sorkarin a dîm dawn lo tih a ni," a ti.

Thu dawn danin, Chhingchhip Mualpui V/C-te hian April 1, 2009 khan ruah leh thlí vanga an khuaa in chhia tanpui nan Serchhip DC hnenah tanpuina an dil a, DC-in Rs. 5,000 a pe a; mahse pawisa hi in chhe neitute'n an dawng lo. V/C-te chuan, silpauline lei a, sem angin an sawi thung. V/C-te hian mi paruk chanai Job Card chu an mahniin an pumbilh nia sawi a ni bawk.

He thil hi LAD-in vawi hnih an chhuifiah hnuah, sorkar chuan V/C chu thiat turin August 13, 2010 khan order a tichhuak a ni.

Hetih lai hian, Tuikum Block Congress Committee (TBCC) chuan thuchhuah siamin, Chhingchhip Mualpui V/C chu NREGS sum leh DC atanga thli tleh tuarte tanpuina sum an hmang dik lo tih finfiah a nih avangin thiah an nih thu an tarlang bawk a; "Mahni V/C-te pawh an dik lohnaa chhan tlat loa thiat mai ngam sorkar kan nei hi kan chhuangin kan thlawp tlat a ni," an ti..

Phai lama motor rûk, Mi­zorama zuar chhawng thin nia hriat, Bishnu Thapa chu September 4 khan bus-a a chuang lai lo changin police-in an man a, thu zawhfiah atan an kawl mek.

Police-te chuan Bishnu Thapa hi phai lama motor rûk Mizorama hralh chhawn leh chungchangah hian a hotupa ber ni loin an hria a,  inhnamhawih dang hriat chhuah tumin thu an zawtfiah mek. Nimin khan an dil angin Court chuan darkar 48 kawl phalna a pe leh a ni. Bishnu Thapa hi motor rûk zawrh chungchanga police-te'n an rinhlelh reng tawh a ni a, motor ruk leh hralh kawngah a inhnamhnawih nasa hle nia hriat a ni.

Mission Vengthlang Village Education Committee-in, an veng chhunga zirna in hrang hranga Teachers' Day puala zirtirtute tan inkhawm a buatsaiha khuallian, Education Minister Lalsawta chuan, kumin atangin pawl 1 atanga pawl 6 exam-ah Common Question leh Work Schedule-te kalpui ngei a nih theih nan hma lak mek a nih thu a sawi.

Lalsawta chuan, "Zirtirtute hi ram leh hnam tana mi tha leh tang­kai chher chhuaktu an nih avangin mawh­phurna sang tak an nei a ni," a ti a; Education Reforms Commission-in rawtna an siamte chu August 3-a Cabinet thukhawmin a vaia an pawm thu sawiin, rawtna thenkhatte chu tihpuitlin nghal mai theih a nih lo thu a sawi.

Education Minister chuan, zir­tirtute chu naupang thiam thei lote pawh thiam theia an chhuah theih nan an zirtir dante ennawn thin turin a chah a, "Zirna in tinuamtu chu building tha leh thil dang ni loin, naupangte leh zirtirtute inkara inlaichinna tha neih a ni," a ti. Zirtirtu thil dik lo ti an awm chuan, sorkarin a dim dawn loh thu a sawi bawk.

Teachers Day hi Pathianni a nih avangin, Mizorama sikul eng emaw zat chuan nimin khan an hmang a. Nimina Teachers Day hmangtute zingah, Hnahthial SDEO hnuaia sikulte chuan Hnahthiala sorkar hnathawk leh sumdawngte hnena zirtirtu tanpui ngaite tanpuina tur thawhlawm an khawn a, Rs. 3,466 an ngah; Hnahthial Group YMA-in 2009 board exam-a result nei tha pariatte chawimawina an hlan bawk.

Saiha-ah chuan DC, Kunal hoin Don Bosco School-ah an hmang a; Teachers Day puala Middle School, High School leh Higher Secondary School te tana Painting Competition buatsaiha ti thate hnenah DC-in lawmman a hlan a ni.

Chief Minister Lal Thanhawla te nupa chuan September 4 khan Washington DC, USA an thleng a, Mizo Society of America hruaitute leh, Indian Embassy-a Head of Councellor leh Head of Chancery ten an lo hmuak.

Lal Thanhawla te nupa hi Pathianni khan Mizo hnahthlak hrang hrang hruaitute nen an inkâwm a; Ashok Saxena pawh kawmin, Mizorama kawlphetha leh hriselna lam atana infrastructure din chhoh dan tur chungchangte an sawi dun.

Chief Minister hian nimin khan USA-a Mizo Day vawi 25-na a hmanpui a, Mizo pawl hrang hrangte nen an inkawmho nghal. Vawiin hian Worldwide Bank Executive Director for India, Sri Lanka and Bhutan, P Chatterjee nen an inkâwm dawn a; World Bank Vice President for South Asian Region, Xianzhu a kâwm bawk ang.

November thla khian MSACS leh Doordarshan Kendra tangkawp chuan Red Ribbon Choir Competition an buatsaih dawn a; he zaipawl intihsiakna atana ruahmanna neih tawhte chu nimin khan Committee member-te'n Health Minister, Lalrinliana Sailo hoin an sawiho.

Red Ribbon Choir Competition hi kohhran zaipawlte inelna tur a ni a; November thla chhungin intihsiakna buatsaih a, December 1 - World AIDS Day-a final round leh result puan tura ruahman a ni.

Nimina meeting chuan member 16 awmna Working Committee a din a, he Committee hian zaipawl intihsiakna atana tul zawng zawngte an ngaihtuah dawn a ni.