Jeremy a vanduai

Commonwealth Senior, Junior leh Youth Championship neih mekah nimin khan Jeremy Lalrinnunga a inlan a, Mizo rawlthar hi 67kg huangah khelin medal a hlawh chhuak zo lo.

Apia, Samoa inelna neihah Jeremy hian snatch 136kg a chawi a, hei hi world youth record a ni. Mahse, clean & jerk bikah Jeremy hian 160kg chu attempt hmasaah zo loin, a vawi hnihna leh vawi thumnaah pawh 160kg tho a chawi zo lo - snatch chawi ṭha viau mah se pakhat zawk a hlawhtlin loh avangin total a awm thei lo a, result a nei lo a ni.

Govt. Complex rawlthar Jeremy hi national leh international tournament-a a inlan tawhnaah a cheṭha tlangpui a, amaherawhchu inelna hnuhnung pahnihah a chet ṭhat tawk loh avangin 2020 Tokyo Olympic khel phak tur chuan inelna dang an hmachhawn hunah a chet ṭhat a ngai ang.