Ruihhloa inhnamhnawih police-te lakah Action na tak lak zel a ni ang : AP CM

Arunachal Pradesh chief minister Pema Khandu chuan police zingah ruihhlo ti leh ruihhloa sumdawnna kawnga inhnamhnawih hriat chhuahte laka action na taka lak a nih tur thu a sawi. 

Police Training Centre (PTC) Banderdewa-a Diskhant Parade a hmanpuinaah he thu hi CM chuan sawiin, ruihhlo chuan an state ṭhalai tam tak nun a tichhia tih sawiin, theihtawpa an do zel tur thu a sawi a ni. 

Chief Minister chuan state sorkarin district tinah ruihhlo dona kawnga hma la tur Special Task Force (STF) din a ni vek dawn tih sawiin, STF-a tel police-te chu special incentive pek an ni ang, a ti. 

Khandu chuan police-te tana training neih ṭhat a pawimawh thu sawiin, police eng emaw zat physical fitness level chu a ṭha tawk lo tih a hmuh thu a sawi a, hei vang hian home department hnenah police-te chu duty-naa an fit ṭhat reng theihna atan physical training buatsaih fo turin a ngen bawk a ni.