Golden State hmachhawn tur Spurs
NBA regular season a zo a, a thiam zual 16 ten playoff an khel ṭan nghal dawn. Zanin dar 12:30 hian champion lai Golden State Warriors leh San Antonio Spurs ten an match hmasa ber an khel ang.
Champion lai Golden State hian Western conference-ah pahnihna ni chungin regular season an zo a, an conference lama pasarihna an hmachhawn a ṭul. GSW hian hliam vangin guard pahnih Stephen Curry leh Patrick McCaw te an chhawr thei dawn lo. Mahse, Klay Thompson, Kevin Durant leh Draymond Green te an dam ṭhat avangin lungngaihna tur a awm lo ang.
Western conference-ah hian tun hnai season thum chhung Golden State an chungnung hle a, a chung bera awm chung zelin regular season an khar. Amaherawhchu, kuminah chuan thil a danglam tawh - match 65 hnehna chang thei Houston Rockets chu pakhatna niin, Rockets hian pariatna Minnesota Timberwolves an hmachhawn thung dawn a ni.
NBA playoff-ah hian Eastern Conference leh Western Conference champion an zawng phawt ang a, conference pahnih champion te hian NBA Finals an khel leh dawn. Inelna hi best-of-seven series hmanga neih tur a ni ang.