Aizawl - the silence city

State khawpui dangah kal ila ri thei zawng zawng a ri emaw tih mai tur a ni a, ṭul lo lutukah pawh motor horn ri reng mai chu a ninawm ṭhin khawp mai. Aizawl leh Mizoram district khawpuiah chuan ṭul fe-ah lo chuan lirthei horn tihrik a awm ngai lo a, hei hi Aizawl chu silence city tia vuah tlak a nih chhan a ni. 

Silence city tih hming hi Aizawl hian pu ngei se tiin AMC ah pawh ka rawt tawh ṭhin a, an la beng­khawn chiah lo pawh a ni mai thei e. Sawi angin Aizawl khawpui chu traffic hamrik a ri tam ber a, hei hi a ri tur pawh a ni. Horn hmeh chiam chiam an awm lo a, horn hmet ri deuh an awm pawn kan en hu hu zel a nih hi. Heti khawpa khawpui reh lo hi India ram state khawpui dangah a awm lo a, a hahdam thlak ngawt mai.

 

Hetihlai hian kan taxi khalhtu ṭhenkhat leh ambulance khalh­tute hian bengchheng an siam tam hle. Damlo na lutuk lem lo pawh phur se, emer­gency/ hazard light an chhi a, horn an hmet a, hmaa mite chep tak tak karah tlan khalh an tum ṭhin. Damlo pawh phur se, an nunna-in a tuar dawnte a nih loh chuan hazard light chhit leh horn hmeh chiam chiama mahni hmaa mite tlan khalh hi a ṭul lem lo. Damdawiin thlen pui vat loh chuan a nunna-in a tuar dawn a nih chuan thuhran a ni. 

Kan ambulance service ho tak hian khawpuiah ri beng­chheng an siam nasa hle. Hazard light an pawt a, siren ring mang­kheng an pawt ri a, hei hian khawpuiah ri bengchheng (noise pollution) nasa takin a siam a ni. Ambulance in emergency-in a phurh tam tak hi heti em ema emergency vek a nih a rinawm lo. Ambulance a ni a, damlo a phur ngei a, mahse emergency lutuka tlanpui chi vek an nih a rinawm lo. 

Heng ambulance leh taxi, damlo phurte hi traffic police pawh hian check deuh thei se a lawmawm ngawt ang. siren ring tawk ti ri chungah khawpuia an tlan ṭhin hian mi a ti ralkhel a, khawpuiah ri bengchheng a siam nasa bawk a, chu­vangin hetiang lam­ah hian damlo phurte pawhin an damlo phurhte kha eng din­hmunah nge an din an hriat a ṭul fo. Damlo nazawng phurh vanga siren an ti ri chiam chiam ṭhin hi a nin­awm thawkhat hle. Taxi ṭhenkhat mi­pui leh traffic police buma hazard ligh chhi chungah traffic jam kara mi tlan pel an awm fo. Hetiang ti duh taxi driver-te hi check deuh chu an ngai a ni. Damlo phur ni si lo, damlo der phura mi tlanpel an awm ve fo mai hi a ngaihmawhawm hle. Traffic police te hian ṭan han la se, khawpui ri bengchheng siamtu tam zawk hi tihreh theih a ni ngei ang. 

- Lal Rinmawia