Madagascar president Andry Rajoelina chuan an ramah sipai helna a thlen avangin a nunna a derthawng tih sawiin, ram dangah a tlanchhia tih Thawhṭanni khan a sawi. President a nihna aṭang erawh a bang lo tih a sawi bawk.
Gen Z kaihhruaiin Madagascar-ah sorkar laka lungawi lohna hun eng emaw chen aṭangin lantir a ni tawh a, Inrinni liam ta khan nawrh huaihawtte hi an ram sipai, CAPSAT elite unit in an zawm a ni. President leh minister dangte chu bang turin an phut. Rajoelina chuan sipaiten nawrh huaihawtte an thlawp tak avangin sipai chakna hmanga a thuneihna aṭanga paihthlnak tumna a awm tih sawiin, a nunna venghim tura hmun him lama a tlanchhiat mai a ngai ta tih a sawi. A tlanchhiatna ram a sawi lo a, a thusawina video hi Thawhṭanni zan khan national television-ah tihchhuah a ni.
Rajoelina chuan an ram buaina chingfel tura inbiakna neih a ṭul thu sawiin, ram danpui chu zah a ni tur a ni, a ti bawk. Rajoelina tlanchhiatna ram hi tarlan ni lo mah se, report ṭhenkhat chuan France sipai thlawhtheihna a hmang niin an tarlang. France foreign ministry chuan hemi chungchangah hian sawi a la nei lo thung. Madagascar hi France colony ṭhin a ni a, Rajoelina pawh hi France khua leh tui nihna nei nia sawi a ni.
September thla tawp lama politician pahnih, an ram khawpui Antananarivo-a electric leh tui supply ṭhat loh vanga lungawi lohna lantir tumte man an nih hnuah, Gen Z huaihawtin eirukna, rorelna ṭha tawk lo leh mipui mamawhte ngaihtuah ṭha tawk loah puhin sorkar laka lungawi lohna hi lantir chhunzawm a ni. Khawpui dangah pawh nawrh hi huaihawt a ni bawk. Nawrh huaihawt leh security force-te inkara buaina chhuakah mi 22 an thi tawh a ni.
CAPSAT elite unit hi kum 2009-a sipai chakna hmanga Rajoelina-an thuneihna a chan theihna atana puitu a ni. Mahse, tun ṭumah hian nawrh huaihawtte leh securit force-te innawr buaina thlenga security force lamin silai an hmehpuah hnuah mipui lam hi an thlawp ta a ni. Inrinni khan an ram sipai pawh an thununna hnuaiah a awm tih sawiin, sipai hotu thar tur pawh an ruat nghal bawk.
