Pakistan leh Afghanistan sipaite ramriah inkap

Pakistan sipai leh Afganistan-a Taliban sipaite chu kar liam ta Inrinni zan khan ramriah an inkap a, Taliban hian Pakistan border post pathum an la tih an sawi. Pakistan lam hian Afghanistan post eng emaw zat an tichhia tih an sawi ve bawk.

Ram pahnih sipaite hian ramria hmun parukah an inkap a, thi leh hliam an awm leh awm loh erawh an sawi lang lo ve ve a ni.

Afghanistan-a Taliban sorkar chuan Ningania Pakistan sipaite an ram boruak china lut a, ramri bula bazar hmun an bomb avangin Pakistan chhan letna atan border post-te chu an bei tih an sawi. Hetih lai hian Pakistan interior minister Mohsin Naqvi chuan Afghanistan lamin an beih letnaah civil mite an bei tel tih sawiin, an ram leh ram mipui venhimna turin an che chhuak zel dawn tih a sawi. Afghanistan sorkar an ram leilung aṭanga Pakistan beitu firfiakte thlawpah a puh bawk a, mahse, a puhna hi Taliban sokar chuan a pha thung.

Ramria inkahna thleng vang hian Pakistan chuan nimin aṭang khan Afghanistan nena an ramrite a khar nghal a ni. Nimin zing khan hmun tam zawkah inkap thawm hriat tur a awm tawh lo a, mahse, Kurram area-ah silai puak thawm hriat tur a la awm. Afghanistan leh Pakistan hian ramri km 2,600 a thui an inṭawm a ni.