Mexico-ah ruahsurin chhiatna a thlenah mi 41 an thi

Mexico ram lai leh chhim chhak lamah kar liam ta Zirtawpnia ruahsur nasain tuilian leh leimin a thlenah mi 41 an thi a, chenna in leh infrastructure dang eng emaw zat a chhe bawk.

Hidalgo state chu chhiatna thleng tuar nasa ber niin mi 16 an thi a, leimin leh tuilian vangin chenna in 100, hospital leh clinic 59, leh school 308 a chhe tel. state chhunga municipality 84 zinga 17-ah current an nei lo bawk. Sorkar laipui chuan harsatna tawkte ṭanpui leh chhawmdawl hna thawk turin sipai 8,700 a tir a ni.

Puebla state-ah pawh chhiatna thlengah mi pakua an thi a, chin hriat lohin mi 13 an la awm tih nimin khan governor Alejandro Armenta chuan a sawi. Sorkar laipui hnenah chhanchhuah hna thawhna kawnga pui turin a ngen. Leiminin gas pipeline a tihchhiat thu a sawi a, tuilian leh leimin vanga an state-a harsatna tawk chu mi 80,000 vel an tling a ni, a ti.

Tulian leh leimin hian chenna in 5,000 vel a tichhia a, Navy-ten tuilian tuar mi 900 chu hmun him lamah an sawn chhuak tawh bawk. State parukah kawngpui km 1,000 vel dawna thui chu a chhe bawk niin thuneituten an sawi.