Hurricane Melissa-in ram 3-ah chhiatna thlen

Thlipui na tak, hurricane Melissa in Haiti, Jamaica leh Dominican Republic a nuai a, chhiatna a thlenah mi 29 an thi. Jamaica-ah mi pathum an thi a, Haiti-ah mi 25 leh Dominican Republic-ah mi pakhat an thi.

Hurricane Melissa hi category 5 storm niin Thawhlehni khan Jamaica a thleng a, darkar khata km 295-a chakin a tleh a, Atlantic thlipui tleh tawh zinga a na ber zingah a tel pha. Mi 25,000 chuang chu thli tlehin an chenna a lenchhiat avangin hmun dangah an insawn a, an ram mipui 77% vel chu Nilaini khan power supply nei loin an awm bawk.

Cuba-ah pawh thlipui tleh hian chhiatna nasa tak a thlen a, in tam tak a lenchhiat bakah ruah sur vangin leiminin kawngte a hnawh bawk. Thli hian ruah a ken tel bawk avangin Haiti chhim lamah tui a lian bawk a ni. Mi tam tak chenna nei lo leh power supply nei loin an awm a ni.

Thlipui tlehin chhiatna nasa tak a thlen avangin Jamaica chu 'disaster zone' ah puan a ni tih thuneitute chuan an sawi. Prime minister Andrew Holness chuan harsatna tawkte natna a hriatthiampui thu sawiin, theihtawpin chhanchhuah leh chhawmdawl hna an thawk dawn a, an ram chu a hma aia ṭhain an indinthar leh dawn a ni, a ti. Jamaica-ah hian Melissa anga thlipui na hi a la tleh ngai lo niin an sawi.