Myanmar sipai sorkar leh armed group TNLA in inremna siam

Myanmar sipai sorkar leh hel pawl, Ta’ang National Liberation Army (TNLA) chu thla eng emaw zat an ram hmar lama an inbeih hnuah China palaina hnuaiah inremna an siam thei ta.

TNLA chuan China kaihhruainain ramri bul, Kunming-ah sipai sorkar aiawh nen ni eng emaw zat inbiakna an neih hnuah inremna an siam thei ta niin a sawi. Inremna an siamah hian TNLA hi upper Mandalay region-a ruby khur hmunpui, Mogok aṭang leh, Shan state hmar lama Momeik khua aṭangin an inhnukdawk dawn a, a hun tur tak erawh an la sawi lang lo. Sipaite hian helpawl laka thlawhtheihna hmanga beihpui an thlak ṭhin an titawp ve bawk ang. Nilaini aṭang khan helpawl leh sipaite hian an inbeihna pawh an titawp tawh niin an tarlang.

Helpawl pathum intelkhawm, Three Brotherhood Alliance-ah TNLA hi a tel a, anni bakah Myanmar National Democratic Alliance Army leh Arakan Army an tel bawk. Kum tam tak chu an bial tana thuneihna sang zawk pek phutin sorkar lakah an lo hel tawh a ni. Kum 2021 February thlaa sipaiten civil sorkar paihthla a, thuneihna an chan hnuah sipai sorkar dodaltu democracy group-te nen an inthurual zui bawk. Kum 2023 October aṭang khan helpawl ṭangrualte hian Myanmar hmarchhak leh khawthlang lam bial eng emaw zat chu lain an thunun a, TNLA bil hian khaw 12 an la bawk.

China hmalaknain kumin kumtir lam khan sipai sorkar nen ṭum eng emaw zat inkahhai an lo puang tawh a, hemi hnu April thla khan sipaite chuan khawpui lian Lashio chu la letin, July thlaah Nawnghkio leh October thlaah Kyaukme an la let leh a ni. Sipaite kut aṭang lak let tum hian tun hnaiah an inbei ngawrh leh hle a, mahse, China ruahmannain inremna hi an siam thei ta a ni.