Lok Sabha chuan Nilaini khan Foreign Contribution (Regulation) Amendment Bill, 2026 chu endik leh zir chian turin Joint Parliamentary Committee (JPC)-ah a thawn a, he mi hnu hian eptu pawl lamin he bill hi hnam leh sakhaw tlem zawk te tichhe tur leh bitum tumna a ni tiin hnawl leh hlip zui nghal turin sorkar laipui an phut.
Foreign Contribution (Regulation) Amendment Bill, 2026 zir chiang tu tur JPC-ah hian member 31 an awm dawn a, heng zinga 21 hi Lok Sabha MP te niin, 10 hi Rajya Sabha MP te an ni dawn a ni. Lok Sabha MP-te hi Speaker Om Birla-an a ruat dawn a, Rajya Sabha MP-te erawh Chairman C.P. Radhakrishnan-a'n a ruat thung ang. He JPC hian kumin Parliament Winter Session chawlhkar khatna ni hnuhnung ber aia tlai loah an report hi an thehlut hman tur a tih a ni.
He bill hian pawl pakhatin FCRA licence a hloh emaw, hlihsak a nih emaw chuan an sum leh pai leh bungruate enkawltu tur 'designated authority' ruat a rawt a ni. Hei hi tualchhung NGO, a bik takin Kristian leh sakhaw tlem zawk ten sakhua leh zirna lama pawl an enkawl mekte rawngbawlna leh ṭanpuina pawisa ram pawn aṭanga an hmuh ṭhin tiṭhuanawp thei a ni tiin eptu pawl te chuan an duh lo hle.
Congress senior MP K.C. Venugopal chuan he bill hi NGO te, a bik takin sakhaw tlem zawk te pawl enkawlte beihna hmanrua a ni tiin bill hi hnukdawk nghal turin a phut a. Samajwadi Party MP Akhilesh Yadav leh DMK MP T.R. Baalu te pawhin eptu pawl zawng zawng an tang rual tiin bill hnukdawk tur hian an duh thu an sawi zui bawk.
