PM Modi-a'n Odisha-ah Rs vbc 160 hu fishery project lungphum phum

Prime minister Narendra Modi chuan Inrinni liam ta khan Odisha-ah Rs vbc 160 hu project pahnih thawhna tur lungphum virtual-in phum. Delhi-ah project dang,Rs vbc 24,000 hmanna Pradhan Mantri Dhan Dhaanya Krishi Yojana (PM-DDKY) leh Rs vbc 11,440 senga Mission for Aatmanirbharta hnuaia pulses thar tihpunna tur a hawng leh bawk.

Fishery project thawhna tur sum ruahmanah hian Basantapur, Sambalpur district-a aqua park siamna tur Rs vbc 100 a tel a, fish market Pandara, Bhubaneswar a siamna tur Rs vbc 59.13 a tel bawk. Project tihhlawhtlinna tur hian state sorkar hnuaia Fisheries and Animal Resources department leh Bhubaneswar Municipal Corporation (BMC) an thawk dun dawn a, mi 2000 chuang tan hna thawh tur a siam bakah, sumdawng 143 te'n hlawkna an tel thei dawn a ni.

Project tlangzarh inkhawm hi chief minister Mohan Charan Majhi, leh deputy CM K.V. Singh Deo leh official eng emaw zatin an hman pui bawk. CM Majhi chuan project kaltlang hian sangha zuartu leh leitute mamawh chu Bhubaneswar leh Cuttack-ahte tihhlawhtlin theih a nih tur thu a sawi a, aqua park kaltlang hian tunlai zawka sangha farm siamna kawngah a pui thei dawn niin a tarlang. Project thawhna tur hian BMC chu MoU an ziahpui a, kum 2027 November-a zawh hman tura ruahman a ni bawk.