Eptu pawl SIR dodal chhan 'vote bank' hum duh vang : BJP

Bharatiya Janata Party (BJP) chuan Nilaini khan eptu pawl Congress leh Trinamool Congress ten electoral roll ennawnna, special intensive revision (SIR) kalpuina tur an dodal chhan chu an 'vote bank' humhim an duh vang a nih thu an sawi. BJP thupuangtu, Shehzad Poonawalla chuan eptu party chu lan mawi leh intlawn na atan chauha politics khelah a puh bawk.

Poonawalla chuan eptu party-te chuan ram danpui laka rinawm taka lan tum mah se 'vote-bank' politics an tuipui zawk niin a sawi a, Congress chu Pakistan thlawp a nih thu leh tun hnaiah Bangladesh lam awn leh ta an nih thu a sawi bawk. Congress leh an hruaitute chuan dan loa Bangladesh aṭanga lut rute chu hun rei tak aṭanga an thlawp thu sawiin, ram himna leh inpumkhatna tichhetu an ni, a ti.

BJP chuan dan loa lut rute chu a duh lo a, hengte hi a kaihhruia NDA chuan 3D policy 'detect, delete, leh deport' hmanga an nuaibo ṭhin thu Poonwalla chuan a sawi. Hetih laiin Congress chuan an 3D policy 'divide, distort, leh defend' hmangin dan loa ramri kan an hum tih a sawi lang bawk.

Congress leh Trinamool Congress chuan SIR an dodal ve ve tih sawiin, West Bengal-a Trinamool hruaitu chuan ualau takin an 'vote-bank' neih chhunte humna turin election commission leh BJP thawktute an rikrap ngam niin a tarlang. Trinamool Congress, Congress, emaw DMK emaw chuan mi tlawn hmanga politics khelh an ching hle tih Poonawala chuan a sawi.