India-in dan leh hrai kenkawh hna technology milin kalpui dawn: Law Minister

Union law minister Arjun Ram Meghwal chu Nilaini khan Justice Minister Meeting (JMM) vawi 12-na, Shanghai Cooperation Organisation (SCO) a neihah virtual hmanga telin, India chuan dan leh hrai kenkawh hna chu technology hmanga kalpui a tum thu a sawi.

Meghwal chuan India sorkarin dan leh hrai, mi tin ban phaka siam tura hma a lak tur thu sawiin, hemi atan hian E-Lok Adalat chu kalpui tum a ni, a ti. He hmalakna hmang hian mi hnuaihnung zawkin dan leh hrai awlsam zawkin an hmang ṭangkai thei dawn a ni. Buaina chinfel a awlsam theihna atan alternative dispute resolution (ADR) kalpui tum a ni a,India-a investment leh sumdawnna tihmasawn thei turin Commercial Courts Act leh Arbitration & Conciliation Laws-te kalpui tum a nih thu a sawi bawk.

Meeting-ah hian India bakah ram hrang hrang - Belarus, Iran, Kazakhstan, China, Kyrgyz Republic, Pakistan, Tajikistan, Uzbekistan aiawhte leh SCO-a deputy secretary general Khan Soheilte an tel. JMM vawi 12-naah hian thuchhuah inṭawm ram hrang hrangin an hman tur pawh siam niin, hman zui tura pawm a ni bawk a ni.