Man City hmaah Hammers

Vawiin tlai dar 5:00 hian West Ham-in Manchester City an mikhual dawn. David Moyes-a enkawl Hammers-in season bul an ṭan chhe lo a, an fixtures aṭanga teh phei chuan Pep Guardiola hote tan pawh point hloh theihna tur an ni.

Hammers hian Tottenham Hotspur laka 3-0 an hnufual hnuah siphurh an sut zo a, 3-3 in an inhnehtawk. Moyes-a hote hian Spurs hma hian Leicester City (3-0) leh Wolves (4-0) an sawp tawh a, chutihrualin khelh fuh loh niah chuan Everton lakah 4-1 in an tlawm tih hriat tel a ṭha.

West Ham boss Moyes chuan, "Man City-in hma an sawn a, keini pawhin hma kan sawn ve tho," tiin result ṭha neih a tum hle. London club hian Europe inelna an hmachhawn ve loh avangin hahdamna hun ṭha an nei a, Spurs nena inkhel zo chiah Hammers hian Man City an hmachhawn zawhah Liverpool nen an intawn lehnghal dawn avangin fixtures a hautak hle.

Scottish manager Moyes-a'n Declan Rice leh Tomas Soucek te a chhawr thiam a, Man City nen pawh hian defender panga dahin midfielder pahnih hian attacking aiin tlarhnung an puih tam zawk a rinawm. Chutihrualin Man City erawh point thumah chauh an lungawi dawn a, Sergio Aguero an dam ṭhat tawh avangin goal bawh pawh a na dawn.

Aguero thlawp tur hian Riyad Mahrez, Raheem Sterling, Ilkay Gundogan, Bernardo Silva, Ferran Torres leh Phil Foden te an awm a, midfielder rinrawl Kevin De Bruyne dinhmun la hriat loh mah se chak ngei tura ngaih an ni. Amaherawhchu Man City hi Nathan Ake leh Ruben Dias an neih hnuah pawh tlarhnung a la phui lo a, Hammers laka chesual thei an ni.