Covid vaccine pek thawh 2-na ṭan a ni

Covid-19 laka invên­na damdawi (vaccine) dawng hmasate hnena pek vawi hnihna (second dose) chu February 13, Inrinni khan India ramah ṭan a ni a, Mizoramah pawh ṭan nghal a ni.

Covid vaccine pek chungchangah sorkar thupuangtu Dr Lalzawmi chuan, vaccine dose hnihna pek hi Mizorama district tinah ṭan nghal a ni lo a, Inrinni khan district pakhatah chiah pek ṭan a nih thu leh, vawiinah district dangahte pek ṭan tur a nih thu a sawi.

Vaccine pek vawi khatna bik chu Mizoramah pek zawh a ni ṭep tawh a, vawiinah zawh theih beisei a ni. Healthcare worker-te hnena dose khatna pek tawh chinah Mizoramah chuan pek tura chhinchhiah zinga 71% vel pek a ni a; hei hi India rama state leh union territory (UT) zingah a sang páwl a ni.

Dr Lalzawmi sawi danin, Covid vaccine dose hnihna pek ṭanah, Inrinni khan Serchhipah frontline worker-te hnenah vaccine pek ṭan a ni. Serchhip district-ah hian Inrinni bikah chuan mi 315 hnenah pek a ni a, nimin khan pek chhunzawm niin, mi 200 pek tum ni mah se, an pek zat chiah hriat a ni lo. 

Covid-19 vaccine frontline worker pek tur zat chu healthcare worker aiin an tam zawk tih sawiin Dr Lalzawmi chuan, "Mi 28,000 chuang zân pek tur an awm. Frontline worker-te hi an awm darh nasa a, tuna la hmuh zawh mai loh pawh tam tak an awm a, an awmna kan la inzawng khawm mek zel a ni," a ti. 

Sorkar laipuia Ministry of Health & Family Welfare-in a tarlan dan chuan, February 13, Inrinni zan dar 6 thleng khan India ram pumah mi 80,52,454 hnenah Covid vaccine pek a ni tawh a, Mizoramah mi 11,332 pek an ni tawh.

Ministry of HFW tarlan danin, Covid vaccine pek tawh mi 80,52,454 zinga mi 59,35,275 chu healthcare workers an ni a, mi 21,17,179 chu frontline worker an ni.

February 13-a Covid-19 vaccine 2nd dose pek ṭan ní-ah India ramah healthcare worker mi 7,668 hnenah pek hman a ni. 2nd dose hi 1st dose lâk aṭanga ni 28 hnuah lâk tur a ni a, 2nd dose hi vaccine lak bi kimna a ni.

India rama state leh UT zingah vaccine dawng tur pek tawh zat 70% tling state/UT 12 an awm a, chu'ng zingah chuan Mizoram a tel. Hetih lai hian, Meghalaya, Punjab, Manipur, Tamil Nadu, Chandigarh, Nagaland leh Puducherry-ahte chuan 40% chiah pek a la ni thung.