DC-in rél kawng siam mek a tlawh

Kolasib bawrhsap Dr H Lalthlangliana chuan February 12, Zirtawpni khan Kolasib district-a North East Frontier Railways hmalak meknate a tlawh a; rél kawng kalna tur hnaia khua - Hortoki, Dilzau leh Rasdali khawtlang hruaitu a kâwm.

Bawrhsapin a tlawhnaa rél kawng siamnaa deputy chief engineer Naveen Prakash-a sawi danin, NE Frontier Railways hmalakna hnuaiah hian company lian zual 15 vel hna thawk mek an awm a; March 2023-a Sairang thlenga rél kawng kal tur chu zawh hman tum niin, tun dinhmunah hna thawh tur zinga 78% vel zawh a ni tawh.

Rél kawng atan lei dawh ngai, major bridge (metre 12.2 aia sei) 55 leh minor bridge (metre 12 aia tâwi) 105 a awm a; rél chawlhhmun (station) pali - Bairabi, Kawnpui, Hortoki leh Sairangahte siam tum a ni.