Spider-Man Spin-Off : Kraven the Hunter lemah Aaron Taylor-Johnson

Sony Marvel universe-ah hmel thar kan hmu dawn a, chu chu tudang ni loin Aaron Taylor-Johnson a ni. Ani hi Kraven the Hunter lemah a chang dawn.

Nilaini khan hemi chungchang hi Sony chuan puangzarin kum 30 mi Golden Globe-hial pawh lo dawng tawhtu English actor Aaron Taylor-Johnson chu Spider-Man spin-off film-ah a chang dawn tih leh Kraven the Hunter lema a chan dawn thu hi an tarlang a ni.

Taylor-Johnson hi Marvel khawvelah mi thar ani lo a, Avengers: Age of Ultron-ah khan Elizabeth Olsen-i Wanda Maximoff/ Scarlet Witch unaupa Pietro Maximoff/ Quicksilver lemah a lo chang tawh a nih kha.

Comic chhiar ṭhin leh Spider-Man animated series en ṭhinte chuan Kraven the Hunter hi tunge a nih an hre nghal furin a rinawm. Kum 1964-a tihchhuah The Amazing Spider-Man #15-ah khan Kraven the Hunter hi lang ṭanin, Spider-Man-a hmelma hlun ber zinga mi a ni chho a, a comic-ah chuan supervillain squad, the Sinister Six dintu a ni.

Kraven the Hunter hi live-action screen-ah tihlan a la ni ngai lo a, tun hi an tihlan vawi khatna tur a ni bawk.

Sony hian Spider-Man spin-off siam hi an zawngchhang dawn riau niin a lang. Hlawhtling taka Venom an tihchhuah hnuah tunah hian Morbius leh Venom: Let There Be Carnage-te chu tlangzarh mai turin an peihfel leh tawh a ni. Engtikah emaw chuan heng anti-hero te leh an hmelma Spider-Man pawh an la intawntir mahna!

Kraven the Hunter siam tur hian kum 2018 aṭang khan hma an la ṭan tawh a, Margin Call, All Is Lost, leh Triple Frontier-te hlawhtling taka lo siam tawhtu J.C. Chandor chuan a direct dawn a ni.