Hripui vei mahni thua damdawi ei an tam ; IMA-in hriat tur pawimawh an ti chhuak

Indian Medical Association (IMA) Mizoram State Branch chuan Covid-19 vei mahni thua damdawi lo ei an tam avangin, hripui veite tana inenkawlna kawnga hriat tur pawimawh an ti chhuak.

Vanglaini palai zawhna chhangin IMA, Mizoram president Dr Rosangluaia chuan hripui vei zingah mahni thua damdawi lo ei mai an tam thu a sawi a, "Mi tam takin ṭul miah loah pawisa an sen phah a ni. Dexona phei chu steroid anih avangin hman fimkhur ngai em em a ni a, doctor chawh loa ei chi a ni lo," a ti.

Dr Rosangluaia chuan Covid-19 veite pawh enkawl dan a inang vek thei lo tih sawiin, "A taksa dinhmun azirin an mamawh a dang thei a, doctor chawh pawh ni se mi ei ang lo ei ve ngawt hi a him lo thei," a ti a, symptoms nei lo tan chuan damdawi ei a ngaih loh thu a sawi.