Mizo boxer-ten Silver leh Bronze an hlawh chhuak
National Games 2022-ah Mizoram dinhmun ti ṭha turin Mizoram boxing team chuan silver leh bronze an hlawh chhuak. Nimin khan Mahatma Mandir Venue 3, Gandhinagar-ah boxing middleweight final khelh a ni a, Malsawmtluanga chuan Maharashtra boxer Nikhil Premnath Dubey chu unanimous decision (5-0) in an hneh lo.
Lunglei Electric Veng tlangval Mala hi final-ah chak zo lo mah se silver medal a hlawh chhuak a, Tuipui boxer Lallawmawma chuan featherweight-ah bronze medal a hlawh chhuak bawk. Mizoram aṭangin mipa boxer pathum leh hmeichhe boxer pahnih an kal a, coach Lalfakzuala (SYS), Chanmari Lunglei leh B. Lalhriatpuii, Nursery ten an ho a ni.
Mizoram coach Faka chuan, "Pathian vanga tun dinhmun thleng thei hi kan ni. A tawp thlenga inhnek thei turin hriselna min pe a, kawng engkimah min awmpui avangin lawmthu sawi hi ka ba nasa. Mizo mipui min ṭawngṭaisaktute chungah lawmthu kan sawi a, gold medal kan hnek chhuak thei lo erawh pawi kan ti hle. Gold medal hlawh chhuak ngei turin tun aiin kan thawk rim ang," tiin Vanglaini a hrilh.
Mizoram tan Mala
Mizoram tana silver medal hnek chhuaktu Mala hi Lunglei SAI aṭanga inzir chhuak a ni a, tun inelna tel tur hian 2021 Senior National C'ship-ah quarterfinal a thleng. Kum 2021 vek khan All India Invitation 2021, Kolkata-ah silver medal a la.
Tun hnaiah Mala hian hma a sawn tih a lang a, August thla khan Army Championship-ah gold medal lain best boxer-ah thlan a ni bawk. Best boxer a nih avang hian Army Sports Institute, Pune-ah training a nei chhunzawm a ni.
Gujarat-a neih inelnaah coach Faka hian Mala hi a thiamna tak defensive game-in round tir lamah a hnektir a, round tawp lamah a nawrtir thung. An game plan hi semifinal-a Goa boxer Pushpender Ashok Rathee an hnehna kawngah pawh a pawimawh hle.
Final-ah erawh Mala'n ngai a awh lo a, gold medal a hlawh chhuak thei ta lo. Mizoram coach Faka chuan, "Theihtawp a chhuah a, a chak lo zawkah kan ṭang a ni. Kan inthlauhna erawh a tam lo a, a khelh ṭhat ṭum chu ni se gold kan la ngei ang. Mahse a vanduai zawkah kan ṭang a, kan result hi lawm taka kan pawm a ṭul," tiin Vanglaini a hrilh.
Tum sang zawk
Boxing-ah hian mipa inelnaah category pariat a awm a, pathumah chauh Mizoram an tel. Hmeichhe inelnaah pawh category panga a awm a, pahnihah chiah Mizoram an tel bawk. Mizoten boxing kan ngaihhlutzia ngaihtuah chuan tun aia category tam zawka tel thei tur kan ni.
Chutihrualin tun ṭuma telte erawh an fakawm hle. Mizo nula pahnih Rebecca Lalinmawii leh Kros Hmangaihsangi ten medal la pha lo mah se an hneh loh Minakshi leh Simranjit Kaur ten gold medal an la ve ve. Fixture fuh se, Rebecca leh Kros-i te pawh hi medal la thei an ni ang.
Mizoram coach Lalfakzuala chuan, "Mizo boxer ṭhahnem tak hi Mizoram chhungah an lawm tawk a, kan rilru put hmang hi thlak a ṭul. Senior National-a medal lak châkna an neih a ngai a, National Games-a medal lak duhna thinlung an neih a ngai a, Asian Boxing C'hsip leh Olympic thleng an thlir phak a ngai. Mizoram chhunga ṭha ber nih hi a tawk lo," tiin Vanglaini a hrilh.
Faka chuan sawi chhun-zawmin, "Boxer-te leh coach-te kan ṭan a ṭul a, India ram chauh ni lo khawvela lang tur chuan amateur boxing-ah theihtawp kan chhuah hi a ngai a, sorkar pawhin min thlawp ṭhat lehzual hi a ṭul a ni," tiin a sawi.