YMA-te'n Serchhipa PWD hna an enfiah

YMA Sub-Hqrs, Serchhip hnuaia Vigilance & Monitoring Committee chuan nimin zing khan Serchhip Tuikhuah Venga NH-54 kawngpui tlahniam ṭhin venna tur siam hna thawh mek an enfiah.

Vigilance & Monitoring Committee-in Serchhip YMA Sub-Hqrs. president R Sanghmingthanga hoa an enfiah chhan chu, lei tlahniam ṭhin vênna tur siam hna thawh mek chung­changah complaint an dawn vang a ni a; enfiahnaah PWD SDO Lalduhzuala leh contractor-te'n an lo dawngsawng.

PWD hotute chuan, lei tlahniam ṭhin venna tura hna thawh ṭhenkhat chu a hmunhma leh leilungin a zir loh avangin tihdanglam a ngai a, an tihdanglam hlek avangin a sum a heu phah lo tih an sawi a; a tira estimate-a tel lo, thil ṭul tak ni si retaining wall-te an siam belh tih an sawi bawk.

Serchhip YMA president R Sang­hmingthanga chuan, lei tlahniam ṭhin chu kum tin deuh thaw a che a, harsatna a thlen ṭhin avangin a ṭha thei ang bera siam turin PWD hotute leh contractor a ngen a ni.

Serchhip Tuikhuah Venga kum tin deuh thawa lei tlahniam ṭhin vênna atan kum 2017 khan Disaster Management & Rehabilitation (DMR) department-in DPR an siam a, kum 2020-ah work order hmuh a ni.

DPR chu PWD-in an ennawn leh a, lei tlahniam ṭhin ven nan luikawr dungah basewall pali leh check dam pakhat, link drain, retaining wall leh culvert-te siam a ni a, estimate amount chu cheng nuai 139 a ni.