The Croods: A New Age-in ro a rel chhunzawm

Sum luan luh tlemna Box Office-ah Universal leh DreamWorks Animation film The Croods: A New Age chu pakhatna  a la nih chhunzawm a, sum pawh a la lalut ṭha angreng hle. Nicolas Cage, Emma Stone leh Ryan Reynolds-te'n aw an thawhna animation film hi US bakah ram dangah pawh a che ṭha a, sum pawh a lalut hnem tawh hle bawk.

Hripui leng kara sum tam tak senga siam film tlangzarh phurawm loh zia chu helai kan ram kilkhawr aṭang pawh hian a hriat thiam theih rei ruai awm e. Chutiang karah chuan The Croods: A New Age hi kar hmasa lamah khan beisei phak bakin a che ṭha tawh a, tunkar tawp liam taah pawh khan  theatre 2,205 aṭangin $4,439,855 a lalut leh a ni.

The Croods 2 hian US-ah ringawt $20,340,265 lai a lalut tawh a, ram dang aṭanga a sum lakluh nen chuan $60,002,265 a lalut tling tawh. 

The Hollywood Reporter-in a tarlan dan chuan Krismas velah hi chuan theatre-a kal kher ngai loin in lam aṭangin he film hi premium VOD kaltlangin a en theih tawh an beisei a ni.

Comedy film Luke Green­­field direct Half Bro­thers chu kar tawp Box office-ah khan sum lalut tam ber dawttu niin theatre 1,369 aṭangin $700,160 a lalut.

Half Brothers film-ah hian mi pakhat Renato a awm a, Mexico-a Aviation executive niin Chicago-a a pa thi mai tur a tlawh a ni. Chutah chuan a pa chuan fa dang a nei tih a hre chhuak a, a pa thi tur duhthusam angin a unaupa a la hriat ngai lo nen chuan ramri velah road trip-a an kal dun vel dan chungchang a ni a, film hmuhnawm pangngai tak niin film review-tute chuan an sawi.

Box office palina All My Life ve thung hi chu  romantic drama film a ni a, Jessica Rothe leh Harry Shum Jr.-te channa niin; romance lam ngaina tan chuan film hmuhnawm tak tur a ni bawk. Tun kar tawpah khan US-ah chuan theatre 970-ah chhuah a ni a, $370,315 a lalut a ni.

Tunhnaiah theatre-a han tlangzarh hluai film a tlem ṭhin hle. Box Office mojo-in list a tihchhuahah pawh film thar a tlem hle a, Half Brothers leh All My Life bakah hian theatre 38-ah chiah an tihchhuah Dear Santa chu film thar a ni bawk. Hetihlai hian film re-release erawh tlem azawng a awm.