Europe-in Hri leng thawh hnihna thlen hlauthawng

Europe ram hrang hrangah hun eng emaw chen Covid-19 lengin ziaawm lam a pan a, hri kai hmuh tharte an tlakhniam hnuah tun hnaiah hri kai an pung chak leh hle a, hei vang hian hri leng thawh hnihna a thlen an hlauthawng hle. 

European Centre for Disease Preven­tion and Control chuan kar hnih liam ta aṭang khan Europe ram zingah a zahve aia tam chuan a hma aiin hri kai  hi 10% in an pung tih a tarlang. September 21 khan Europe-ah ni khata hri kai hmuh thar chu 71,365 an tling leh tawh a ni.

Thlasik a thlen chhoh avangin hri leng hian zual lam a pan hlauhthawnna a lian hle a, hei vang hian ram tam tak chuan hri darh tur venna atan khuahkhirhna te pawh an siam thar leh a ni. Mahse khauhkhirhna siam dan erawh a inang lo thung a, ram tam zawk chuan ram pum huap ang ni loin, tualchhung thuneitute hnenah a ṭul dan anga siam turin an dah tlangpui thung. Britain chuan Thawhlehni khan thla ruk chhung atana hman tur khuahkhirhna khauh zawk a lo tichhuak tawh a ni. 

Europe ram zingah hri leng tuar nasa ber, Spain-ah chuan July thla aṭang khan hri kai an pung leh ṭan a, Europe ram zingah hri kai pun chakna ber a ni chho leh tawh a ni. 

Kar hnih liam ta chhung khan hri kai hmuh thar 1,22,000 an awm belh leh a, heng zinga hmun thuma ṭhena hmun khat chu an ram khawpui Madrid-a mi an ni. Ram puma hri kai hmuh tawh hi 6,40,000 an chuang tawh a, hospital-te pawh an indaih lo ṭan leh tawh hle. Thawhṭanni aṭang khan Madrid region-a hri kai tam zualna hmun 37-ah chuan partial lockdown kalpui leh ṭan a ni. 

France health authority chuan September 12 aṭangin an ramah hri kai an pung chak leh tih sawiin, nitin mi 13,000 aia tam hri kai hmuh thar an awm chho ziah tih an sawi. 

Spain tih lohah France hi Europe ram zingah hri kai tamna ber a ni a, mi 4,53,763 in kai tawhin an pung chak hle. Sorkar chuan hri darh tur venna kawnga khuahkhirhna siam dan chu regional authority kutah a dah a, anni hian an huam chhungah ṭul an tih dan angin hma an la a ni. 

Paris, Marsielle, Bordeaux leh khawpui lian dangah pawh thuneitute chuan tualchhunga hri darh tur venna atan khuahkhirhna an siam a, company-te pawh an thawktu tam zawk chu in lam aṭang thawh tir turin tih an ni. Marseille leh Paris-ah chuan zan dar 8 hnuah zu hralh chhuah khap a ni. Paris khawpui leh a chhehvelah  face mask hman ngei ngei tura tih a ni. 

Ireland-ah chuan a bikin an ram khawpui, Dublin-ah hri kai an pung chak hle. Mi maktaduai 4.6 chenna ramah hian hri kai hmuh tawh hi 33,121 an awm tawh a ni. 

Sorkar chuan ruahmanna thar, 'Living With Covid' tih siamin level pangaah ṭhen a ni. Dublin chu level 3 restriction hnuaiah dahin, a bak chu level 2 ah dah an ni. Dublin khawpuiah chuan mi paruk chin bak awmkhawm phal a ni lo a; restaurant, cafe leh pub-te pawh take-away service chauh an neih phalsak an ni. Mipuite chu in lam aṭanga hna thawk tura ngen an ni bawk.

PM office-a assistant secretary general Liz Canavan chuan hmun ṭhenkhatah hri kai pun chak dan chu a hlauhthawnawm chho hle tih sawiin, khuahkhirhna khauh zawk hi Dublin chauh ni lo ram chhung hmun dangah pawh hman a ngai chho maithei tih a sawi. 

Germany hi Covid-19 leng chung­changah khawvela test, track leh tracing system nei ṭha ber zingah sawi a ni. Mahse heti chung hian September thlaah hri kai an pung chho chak leh hle. Hri kai hmuh tawh hi mi  2,71,415 an awm tawh a ni. 

Health minister Jens Spahn chuan an ram ṭhenawmah hri kai an pung chak hle a, hei hian an ram pawh a nghawng a, a la nghawng chho zel dawn nia a lan thu a sawi. 

Hri leng vanga khuahkhirhna a lo siamte chu May thla khan thlahdul a ni a, hri kai an pun chhoh leh avangin khuahkhirhna khauh zawk siam leh a ni. Mi panga aia tam awmkhawm phal a ni lo a, pawnchhuahna hmunah hmai tuamna vuah vek tura tih a nih bakah, vantlang hmunah zu in khap a ni bawk.