Covid-19 No Tolerance Fortnight Vawiinah kalpui ṭan a ni dawn

Covid-19 No Tolerance Fortnight chhungin Covid-19 dona atana sorkar ruahmanna siam hrang hrang - Unlock Guidelines, Standard Operating Procedure (SOP)-te leh The Mizoram (Containment and Prevention of Covid-19) Ordinance, 2020 (Covid-19 Ordinance tia sawi zui a ni ang)-te khauh takin, ngaihhnathiamna tel loa kalpui a ni ang. Traffic police pawhin Covid-19 No Tolerance Fortnight bakah, Traffic No Tolerance Fortnight khauh takin an kalpui nghal dawn a ni.

Covid-19 No Tolerance Fortnight chhung hian office tin leh vantlang hmun lùn laiah Covid-19 dona banner/poster tàr tur a ni a; khaw tin leh veng tinah vantlang aurinna hmangin mipui zirtirna thu puanzar tur a ni bawk.

Health minister Dr R Lal­thang­liana hoa October 21, 2020-a sorkar hotute leh pawl ṭhenkhat hruaitute ṭhukhawm chuan Covid-19 No Tolerance Fortnight kalpui an rêl. Fortnight kalpui a nih chu, hripui inkài chhàwnna chhut chah theih an beisei vang a ni.

No Tolerance Fortnight chhunga duty turin sorkar department-te chu an thawktu zat aṭanga 30% ruat tura tih an ni a; Aizawl khawpuiah chuan hmun 40 velah duty-na hmun siam a ni.

•    Sorkar department/office hotute'n thawktu 70% chu a inchhâwkin pisa an kaitir ang. Thawktu 30%, la naupang deuh leh hrisel zawkte chu Fortnight chhunga DDMA-te pui tura tih an ni a, an awmna district-a DC ṭheuhah ‘Covid-19 Executive Duty’ atana hman turin an hming pek luh tura tih a ni. Sorkar hnathawk, kum lama upa, natna benvawn nei leh nau pâi te chuan in aṭangin hna an thawk ang.

•    Sorkar department/office hotute'n Covid-19 chungchanga inzirtirna - mask vuah, inkar hlata awm, kut silfai/tihthianghlim ngun leh ṭul dangte tarlanna poster/banner a tam thei ang ber an office hmunhmaah an tár ang.

•    Sikul, college leh zirna-in dangte'n online hmangin zirna an kalpui ang. Zirtirtute ráwn tura sikula kal phal a ni lo.

•    Sports tournament huaihawt khap a ni a, inkhelhna hmunah - in chhungah mi 10 aia tam leh páwnah mi 25 aia tam awm phal a ni lo.

•    Fortnight chhungin picnic spot leh gym-te hawn phal a ni lo.

•    Mitthi vuina leh inneihnaah mi 35 aia tam kal khawm phal a ni lo.

•    Lungphun, champha lawm, pawl thila kal khawm, lehkhabu tlangzarh leh thil dangah mi 20 aia tam punkhawm khap a ni. Punkhawmna huaihawttute'n a telte chanchin kimchang (hming, address, phone number leh kal hun) ziahna bu ṭha takin an vawng tur a ni.

•    AMC area-ah Covid-19 No Tolerance Fortnight chhungin Traffic police-in 'Traffic No Tolerance Drive' a kalpui ve nghal ang.