Inkhawm loin Krismas hman a ni
Nimin December 25 kha Lal Isua Krista piancham a ni a, kuminah chuan Covid-19 avangin kohhran hrang hrangte'n ṭum dang angin inkhawm an buatsaih thei lo. Khawlaiah pawh kumdang nena khaikhin chuan khawlaia veivak an tlem hle.
Kohhran hrang hrangte chuan inkhawm theih lo mah se, an biak-in kumdang angin an chei hlawm tho a ni. Biak-in hrang hrangah ṭawngṭai tur leh thla la turin mi engemawzat an kal. Chhungkaw tam tak chuan an inah an inkhawm a, a colony leh chhungkhat anga inkhawmte pawh an awm. Colony leh chhungkhat chaw eikhawm pawh engemawzat an awm.
Ṭum dangah chuan Krismas tukah ruai ṭheh ṭhin a ni a, kuminah chuan kohhran hrang hrangte'n hripui vangin ruai an buatsaih dawn lo. Kohhran ṭhenkhat chuan Krismas leh kumthar lawmna puala thawhlawm hmangin sa an lei a, an kohhran member-te hnenah an sem a, ṭhenkhat thawhlawmte chu nakkum atan an dah ṭha thung.
Kohhranin ruai buatsaih dawn lo mah se, chhungkhat leh colony-a ruai ṭheh tum engemawzat an awm. Hetihlai hian local task force hrang hrangte chuan thuchhuah siamin, ruai ṭheh tur an awm pawhin mi 35 pel lo turin an ngen thung a, ruai buatsaih lo hrim hrim tura ngente pawh an awm.