Thlai hrisel zawk

Agriculture Minister chuan, phai lam aṭanga Mizorama chawhmeh lutte chu damdawi leh chemical a tihṭiah leh enkawl a nih avangin a hrisel lo tih a sawi a, "Hengte hian natna hrang hrang - tha natna, kal natna leh a dangte hi a thlen em tih ngaihtuah tham a ni. Sorkarin chemical fertiliser aiin bio fertiliser, lei hànna tichhe thei lo hman ṭan a duh a, bio fertiliser laboratory unit leh a kaihhnawihte din vat a ni dawn," a ti. 

Kan rama chhung­kaw tam zawk hi lo neia eizawng ni mah se, kan ramin a zir loh avang leh kan lo neih danin a zir tawk loh avangin kan ei leh in tur tam tak hi state pawn aṭanga lakluh a ni. Kan rama kan thlai tam tak hi Vairam aṭangin kan phur lut a, khawi hmuna chin nge a nih a, eng anga enkawl nge a nih kan hre thui lo. 

Tlang kam titiah phei chuan Mizorama kan thlai ei ṭhenkhatah hian phai lama a chingtu lamin a ṭhan duhna turin DDT-te an telh hiala sawi a ni ṭhin a, finfiahna awm chiah lo mah se hetiang titi a awm tawh hi chuan fimkhur a ngai tih chu a hriat. 

Agriculture minister ngei pawhin vantlang hriatah Mizo­rama chawhmeh lo lutte chu damdawi leh chemical a tihṭiah leh enkawl a nih avanga a hrisel loh thu a sawi lang bawk a ni. Mizoramin thlai leh thei hrisel zawk kan neih theihna turin ṭan lak a ngai hle a, kan tlang ram lo neih dan kalphung pangngai hi 'organic farming' ni mah se leileta kan buh leh thlai chinte enkawlna atan leiṭha kan hmang lo thei si lo a, kan leiṭha hman hi kan fimkhur a ngai hle reng a ni. 

A pawimawh ber chu Ag­ricul­ture Minister sawi anga che­mical fertiliser aia bio fertili­ser, lei hànna tichhe thei lo hman ṭan thuai hi a ni. Hemi atana ruahman­na awm mek hi a puitlin ngei theihna turin sorkar hi ṭang zel rawh se.