CHAMPHAI LAMLIAN (KAWNG HARSA)

National Highway No.6, Seling to Champhai chu tunah hian hmun tam takah tihzauh hna thawh mek a ni a. He lamlian hian hmun tam takah kawng hlui awmsa chu ringin tihzauh a ni mai dawn a. Ṭhenkhat erawh chu, National Highway-in kawng grade ṭha leh mar, a tinzawn khua thlira hnai leh ṭha tura a tinzawn a nih avangin a thara sial a ngai dawn a. Khawchhak tlangdunga awmte chuan he lamlian thar hi an nghakhlel takzet. 

Champhai leh Seling inkar kawngpui hi hmana TMB full load chunga mihring an chuan khah ṭhup lai te, MST Bus tricket la tura varṭiana intlar a ngaih laia mi ngar ngar kha a la danglam lo a. Nuam taka ṭhianho leh chhungkuaa zin pawh hian, “Khaw kar kawng pakhat hi chu a ninawm hman hrim hrim,” an tih ṭhin kha a ni. Chhuah phat aṭangin luipui  pandin nghal char char a ni mai. Lui thlen zawhin chhoh leh ngar ngar.  Chhuk char char leh chhoh leh char charin  hlirin luipui panga daikai hnuah Aizawl aṭangin Champhai chu ni tla vanvuai tlanin a thlen theih chauh a ni.

He kawng hi PC sawrkarlai aṭanga CM hriatpui loha mahni MLA puite hek hun thlengin a la len belh lo a, a kikawi dan a la ngai reng. Chutihlaiin Mizorama zin veivak tamna ber zinga mi a ni a. Kum engemaw zat liam ta aṭang phei kha chuan motor lian ke sawm pahnih nei te chu zan khatah motor za dawn dawnin inthlahrung miah loin an han hrual pui leh ta nghal a. Kawngpui a chhe chak em em a, zin veivak tan hun a hek hle bawk. Motor lian tawhin din vang vang a ngai a, motor lian pelh dawnin kawi tam fe remchang zawngin zui ngat ngat a ngai. Kan pel fel a, a hma lawkah a dang. Chutiang reng reng chuan kan insawh nileng ṭhin. Motor hmasawnna chu kawngin a sawn ve si loh chuan a hahthlak ting mai a ni.

Lunglei 235 KM ni ṭhin chuan lamlian thar an nei a, an neihsa hlamchhiah chuang loin Sialsuk lamah 175 KM zawhin chawhnu lamah Aizawl pisa an dawr hman a. Kawng a zau a, a mar bawk a, an duh leh tlai lamah an haw leh mai. Km 60 zet lirthei sang telin an hlep nitin ta mai a. Mi sang tam takin motor chhunga an hun hman ṭhin an hlep te hi a man chhut sen chi pawh a ni tawh lo. 

Fur laiin kawng pakhat lo min pawh nise kawng dang an la nei a, an zawh hmasak ṭhinah khan khaw tam tak a awm a, hlamchhiah a ni chuang lo. Hengte hi hmasawnna chu a ni. Lunglei kawngpui daih alawm tih ngawt chi a ni lo a. Serchhip pa te, Kolasib pa te, Champhai pa te leh Aizawl pain an zawhpui a, mitin kawng a ni. Kawng ṭha neih chu mitin tan a manhla a ni tawp mai. 

Dam mawh hritlan hi mitin tawn theih a ni. Damdawiin pakhatin khawl an lo nei lo a, khawl ṭha leh changtlung zawk pan ngaiin damlote an awm chamchi. Lunglei chuan sawrkar damdawiin changtlung tak leh kohhran damdawiin ṭha tak an nei, mimal damdawiin lam chu sawi lo ang. Hmunpui zawk pan ngai nise nileng chanve lekah Aizawl an thleng. Khawpui lian dang Serchhip leh Kolasib te chu zingkar kal a ni lek mai. 

Champhai chu khitah a nih avangin damlo mangang tan kawng a thuiin kal velna a hautak a. “Kawng ṭha leh hnaivai zawk chu nise kan thleng hman ang,” tihte hian Aizawl an pan loh phah fo mai. Khaw hausa tak an nih bik vang ni loin helicopter service chu seat a full reng a. Ticket chang tur chuan kar hnih thum hmain lak lawk a ngai. 

A theih hram chuan kum upa leh damlote chu an chhungten helicopter-ah kaltir hram an duh ṭhin.  Heng bakah hian ‘charter’ an tia mawni (hire ang hi) hian a khat tawka thlawk hi an awm reng a. He kawng kikawi leh kual, zim leh motor tam tak pumpelh nana helicopter service hi englai pawhin a khat ṭhup reng mai. Heng avangte hian kawng thar, a hnukhnai zawk neih a nghahhlelhawm hle. 

Aizawl damdawiin lama mitthi an awmin ruang hmu loin an chhungte nileng te, zankhua te a an lo ṭah fat fat a ngai bik a. Ruang a lo thlenin tunlaiah pheih chuan inkawl rei a theih si loh. Kan kawng zet chuan ṭah khua a tisei vawng vawng mang e. 

State pakhat khawpui anih avangin Aizawlah hian sawrkar lam thil te, kohhran leh pawl hrang hrang te meeting tura koh hi  kumkhat chhung hian a tam viau awm e. Heng nikhua hian an thian  thenkhatte chu zingkarah rawn chhuakin meeting hmanin an rawn thleng mai a.Bag te fel deuh nen an rawn thawkchhuak keuh mai zel. Champhai lam ami te chuan zin kawnga hak tur, zan a hak tur, mutnaa mi tur, a tuka meeting naa hak tur nen lam ngaihtuah a ngai a. Nikhat meeting turin ni thum tal hman a ngai bik ziah lehnghal. Huiham,  kawng vang vek hi.

Insakna bungraw tha an duh ve a. Leirawhchan te, Balu te, a engkim a nimai, Mistiri Abdula thlengin an mamawh ve vek a. Leirawhchan phai lam rawh Kolasib pain Rs 13 a a lei hi Rs 18 man a ni daih  a. Cement te hi Aizawl pa aiin cheng sawmhnih sawmthumin an leito a. Nuaih khat an sen hian bungrua ringawtah pawh an senghnem asin. Baga balu meterah cheng 3500 chuanga lei te hi a rapthlak a. Kawng tha nghakhlel lo thei pawh an nilo.

National Highways kan tih hi Ministry of Road Transport and Highways, Gov't of India hnuaia National Highways Authority of India enkawl, New Delhi, Dwarka a hmunpui nei, NHAI Act 1988 zulzuia inkaihhruaina mumal tak nei; India ramchhung mamawh engkim phuhru tura Supply Route a ni.  National Highway hi khaw kar kawng satliah ani ve lova, a thlen tur hmun/khua bituk neia ruahman a ni.  Chumi inkara khaw awmte tlawh ngei tura ruahman a ni kher ngai lo. A tum ber chu kawngpui Grade tha leh hnai thei ang bera siam ani a, chu chuan hun hek lo, a hmangtute tana senso tlem, awlsamna thlensak a tum a ni. 

Tuna kawng zawh mek hi 195 Km a ni a .Kawng thar, sawrkar leh kawng laihtu company in an ruahman dan chuan Aizawl to Champhai  hi 150 Km vel hla a ni dawn a, a va nghahhlelawm em!  Khawchhak pa ho Aizawlah an lang ve thei tawh dawn.

Hun hmasa lam, UT leh rambuai laia mipui himna leh rambuai a Sipai chetvelna awlsam tur hisap a kawngpui laih thin khan khua a tlawh hnem a, nuthlawi kawi  tih te a awm fo avangin a kual thin a ni. Chu ngaihtuahna chuan mi tamtak rilru kaihruaiin National Highway No 6-in Kawlkulh  a tlawh dawn lo nia hriain kawng kalna tur Survey  tute an lo dang kir a, CM chu mipuiin Pawndum nen anlo hmuak hial a nih kha. Kan CM chuan  Kawlkulh chu Natinal highway-in a tlawh dawn thu a puang nghal a ni awm e. Mi thiam zawkten kawngpui tha zawk kan neih theihna tura a ruahmanna tih danglam nghal  ni a lang hian a khawihpawi thui dawn hle mai. 

Khua a tlawh hian compensation bakah kawng a zau tak tak thei lo. Mihring, ui leh ar chil hlauh vang ringawt pawhin speed a muang thin. National highway in a paltlang avanga changkang riau tura kan inngaihna te, a hel vanga ro ta riau tura kan inngaihna te hi bansan a hun tawh hle. National Highway in khawchhung a paltlang ninawm  zia hi kan la hre chiang lo a ni maithei a. Truck leh motor tlan nazawng hian khua an ti changkang lova, kawng an tichhe hma a, hnawksak mai an ni tih hriat loh vang te pawh a ni thei a. Tin, compensation beisei pha chinin thiam taka khawtlang an fuih vang te pawh a ni thei ang. 

Khawpui lian a mite chuan National Highway  hi an khua tlawh tir duh lovin By-pass an siam zel a, Aizawl to Tuipang kawng Japan pawisa puk a laih mek ah pawh hian Serchhip khua leh Lawngtlai te pawh  a hel dawn. KMMTP Kawng pawh hian khawi khua mah a pal tlang lo, Lawngtlai atangin Zochachhuah, ramri a pan ding tawp mai a ni. Khawthlang lam kawng pawh Lengpui thlen hma in Lengte lam ah Mamit khua ding tak in a pan mai a, kawng a hnaih phah em em a. Zokhawthar kawng pawh  Champhai daiah a peng daih  a. Zokhawthar kal zawng zawng motor lian leh te in Champhai paltlang se an va buai dawn tak.  

Kawlkulh chhak lama awm khuate hian Aizawl hi thlen ve thuai thuai theih an nghakhlel takzet a.  Double lane ngei mai a khua zawng zawng tlawh kher lova tlan char char hlan hi an nghakhlel hle. Chumi tur chuan mithiam ten ruahmanna an neih ang hi ti puitlingin eichawp politics khelh nan kawngpui hi chu min hmansak lo hram teh u.