Osama bin Laden fapa an that

Al-Qaida hotu hlui, Osama bin Laden-a fapa, Hamza bin Laden chu thah a nih thu US media chuan Nilaini khan a sawi.

NBC News chuan a pa aiawhtu tura thlan, Hamza bin Laden thah a nih thu hi US official pathumin an sawichiang tawh tih a sawi a, mahse thah a nihna hmun leh a hun erawh a sawilang lo. New York Times pawhin US-in beihpui a thlaknaah Bin-Laden-a fapa hi thah a nih tih a sawi ve bawk. 

US State Department chuan kumin February khan Hamza bin Laden lu manah hian US dollar mtd khat a lo tiam tawh a, mahse report pahnihte hian he hriattirna tihchhuah a nih hma hian Hamza hi thah a ni tawh tih an sawi.

Hamza bin Laden hi al-Qaeda dintu Osama bin Laden-a fa 20-te zinga 15-na a ni a, kum 30 mi vel nia sawi a ni. Kum 2011-a US sipaiten Pakistan-a Osama bin Laden an thah hnua a ina document pawimawh an hmuh aṭangin Hamza hi al-Qaida hotu atana rawtnate hmuh a ni. US sipaiten a pa an thah lai hian Hamza hi Iran-ah house arrest-a hren nia sawi a ni. 

Kum 2017 khan US chuan Hamza hi terrorist blacklist-ah a telh a, kum 2018 khan Saudia Arabia pawhin an ram lal thupek angin Hamza chu khua leh tui nihna a hlihsak bawk.