Mizoram tana Central pool-a MBBS seat Tihtawp thu-ah hma la turin sorkar phût

Mizoram Pradesh Youth Congress Committee (MPYCC) chuan, kum 2019-20 atan Mizoram sorkarin central pool-a India ram medical college-ah seat a nei ve ta lo chu pawi an tih thu an tarlang a; central pool-ah MBBS seat Mizoramin a neih leh theih nan Congress sorkar anga hma la ngam turin MNF sorkar an phût.

Congress party ṭha­laite chuan, kum 2017-18 atan pawh central pool-ah Mizoram tan MBBS seat awm tawh lo turin thâwm a awm tih sawiin, "Mizoramin MBBS seat 25 vel leh BDS seat panga a neih ṭhinah central sorkarin MBBS seat 17 leh BDS seat pathum a rawn bi­thliah a. Hei hi Mizoram sorkar khan a vei hle a, chief minister Lal Thanhawla chuan rang taka hma lain, Mizoram tana MBBS seat pek ṭhin chu a ngai ang 25-a tihpun leh ni se tiin Union Health minister Jagat Prakash Nadda lehkha a thawn nghal a ni," an ti.

MPYCC thuchhuah tarlan danin, Mizoram tana central pool-a MBBS seat tihtlem a nih chung­changah Mizoram MP pahnih CL Ruala leh Ronald Sapa Tlau te pawhin Health minister JP Nadda chu appoinment siam hmasa loin hmuh an tum lui a, a zin avangin a khawihtu Arun Singhal, Health ministry-a joint secretary an hmu. Higher & Technical Education minister R Romawia pawhin August 23, 2017 tlaiah Health & Family Welfare secretary CK Mishra a hmu bawk. Chumi hnuah Mizoram chu BDS seat pathum pek belh a ni.

MPYCC chuan, kum 2019-20 chhung atana central pool-ah Mizoram tana MBBS seat pek a nih tak loh avangin doctor zir tum zirlaite an timangang hle tih sawiin, MNF sor­kar chu hma la nêpah an puh. CM Zoramthanga emaw, Health minister R Lalthangliana emawin Ministry of Health & Family Welfare hotute hnenah rûn dâla lehkha an thawn nia sawi chu holam an tih thu an tarlang.

Congress ṭhalaite chuan, 'Mizoramin medical college a neih tâk avangin seat pek loh kan ni,' tia chhuanlam siam mai lo tura MNF sorkar chu chahin, "Congress sorkar hotute angin, BJP sorkar sangawi zawnpuitu MNF sorkar hian ngampa takin, central pool quota MBBS seat Mizoramin a neih leh ngei theih nan theihtawpa hma la ve turin kan phût a ni," an ti.