Catalonia hruai-tute thubuai ngaihtuah ṭan

Spain aṭanga Catalonia independent sualtu Catalonia hruaitu eng emaw zat mante chu Madrid-ah an thubuai ngaihtuah ṭan a ni. 

Catalonia hruaitute hi hel leh ram phatsana puhin thubuai siamsak an ni. Thiam loh chantir an nih chuan kum 25 thleng lung-in tantir theih an ni ang. 

Kum 2017 October 1 khan Catalonia bialah hian Spain aṭanga indan duh leh duh loh chungchangah mipui vote lak a ni a, vote thlaktu tam zawkin indan an thlawp avangin Catalonia regional parliament chuan Spain aṭanga independence hi a puang zui a ni. Mahse hei hi Spain sorkar chuan pawm lo a, ram danpui kalh a ni tiin Catalonia sorkar chu a ṭhiat a, sorkar laipui rorelna hnuaiah a dah zui a ni. 

Catalan hruaitu thubuai siamsak zingah hian Vice President hlui Oriol Junqueras leh Catalan parliament speaker hlui Carma Forcadell pawh an tel. Hetihlai hian Catalonia president hlui Carles Puigdemont chu ramdangah himna zawngin a la tlanchhia a ni.