Deputy CM-in Jal Jeevan Mission-ah Cheng vbc. 63.71 pek belh turin ngen

March 13, Inrinni khan online-in Jal Jeevan Mission (JJM) Ministers’ Confe­rence neih a ni a, PHE changtu deputy chief minister Tawnluia telin, Jal Shakti Minister hnenah Mizoramah JJM hlawhtling taka kalpui a nih theih nan cheng vbc. 63.71 pek belh turin a ngen.

Tawnluia chuan, Mi­zoram sorkarin JJM hnuaia hmalaknate leh ma­mawhte a sawi a; JJM a hlawhtlin theih nan state matching share atan theihtawp chhuah a nih thu sawiin, "April 1, 2020 a sorkar record aṭangin household water connection 1,26,827 ma­mawh a ni a, kum 2019-20 inkarah functional household connection (FHTC) 25,079  leh kum 2020-21 inkarah FHTC 22451 neih a ni. Kum 2021-22 leh 2022-23 chhungin FHTC 69,7895 neih tum a ni," a ti. 

Dy. CM chuan, kum 2021-22 atan Mizoram sorkarin JJM atan budget-ah cheng vbc. 248.45 a dah thu a sawi a; Mizorama JJM hmalakna atan sorkar laipuiin a hun takah sum a pek loh avanga harsatnate sawiin, "Kum 2019-20 khan cheng vbc. 88 mamawh a nih laiin vbc. 69.88 chauh Mizoram pek a ni a, kum 2020-21-ah pawh vbc. 134 mamawh a nih laiin vbc. 89.41 pek a ni," a ti bawk. 

Meeting-ah hian Jal Shakti minister Gajendra Singh Shekhawat leh minister of state Rattan Lal Kataria te bakah, Jal Shakti official-te an tel a ni.