State dang aṭanga vote rawn thlak hi...
Kan mawl vang leh kan hriatna a tlem vang zawk em ni?
Engatinge, Tripura state a awm Tuikuk te, Mizoram state a inthlannaa vote thlak thei tur hearing neih kan dodal lova; vote an rawn thlak pawh kan phal zel tur anga lang hi, eng ngaihtuahna aṭangin nge kan remtih a, dodalna awm miah lova kan ngawih tak ṭhuap hlawm mai le? Hnam anga pawi CAB dodal a ṭul ang bawkin hei pawh hi dodal a ngai lo em ni?
Mizote hi Chanchin Ṭha neitu hnam, kan chenna tur ram pawh a bik taka Pathian min pek nei kan ni a; mahse Politic rama kan zuan luh aṭangin kan hruaitu hmasate'n kawng dik lo zawk min zawhpui a, milem be sorkar hnuaiah min luhpui a. Kan kal chho zel a, kan ram hruaitute'n kan mikhual cham rei te tan, ram leilung fa pawh ni ngai lote tan Autonomouse District Council an siam sakin an pe a. Tunah chuan kan ram leh hnam tana hnawk leh buaipui ngai hling lian tak an lo ni ta.
Tunah hian kan hnam tana hling lian tak min pek belh chhah leh ta zel a. State dang behchhanin kan rama awm duh si lovin, kan tam sat thla zawng leh thuneihna zau zawk ADC dilin central-ah min bei leh mek a. "Chakmate aiin kan tam zawk ADC kan phu," an tih ri te a awm leh. Kan sorkar awm nem dan leh NGO's ten thawm kan nei zawi lutuk hi kan cho awm hle thei.
In tu leh fate nen in chen reng theih nan. Inthlah pun zel nan. In lo hmuingil theih nan Lalpa hian ram a pek te hnenah a ti a ni. An vel hnamte pawh hneh zel turin a humhalh a, a thu an zawm loh chuan an an vel hnam te chu an tan hlingah a siam tur thu te a mi Israel te hnenah a sawi angin kan hnenah a sawi a ni.
Mizote Lal (Chief) thu hnuaia kan awm lai khan, Lal huaisen leh kan pasalṭha te avangin kan ram an humhalh zova, phai ram zau tak thlengin kan ram an humhalh a. Lal huaisente avangin kan hnam pawh a hming ṭha in a thang mawi a ni. Khua Lalte leh Val upate huaisen avangin mipui pawh an thlamuang em em ṭhin.
Kan tunlai hunah pawh ram hruaitu lu, state head te huaisen leh sen lo chu, N.E State bikah pawh CAB chungchang te pawh a hriat viau mai. Tuna kan dinhmunah chuan kan ram neih sa pawh kan humhalh zo lo lek lek emaw tih turin, MZP te pawhin sorkar an koh ei theih loh thu vawi duai lo an au chhuahpui hman a nih kha.
Neih sa chan zawng chuan kal zel lo turin, kan puan ven sawi chhin a hun hle in kan hria. Ṭhahnemngaih thilah, famkim lo takin kan au chhuak ve a. John Pym-a, British Parliament-a leading speaker-in a sawi angin, 'Ka ngawih renga thudik leh kan ramin a tuar ai chuan keima'n ka tuar mai ang,' ka rawn ti ve a ni e. Pathian leh kan ram tan hian tuar hlau ngawih ngawih tur kan ni em ni?
E.L. Journalist