India ram pumah IHIP hawn a ni

India ram puma kalpui tur Integrated Health Information Platform (IHIP) chu nimin khan Union Health & Family Welfare minister Harsh Vardhan-a'n a hawng a; Mizorama kalpui turin Health minister Dr R Lalthangliana'n a hawng ve nghal.

IHIP-ah hian Health department, World Health Organisation leh Jhpiego-te an thawkho a; nimina a hawnna hi biak hmuh theihna (video conference) kaltlanga neih niin, state leh union territory tin aṭangin chief minister, health minister leh hriselna lama thawktute an tel a ni.

Mizoram tana IHIP hawnnaah Dr R Lalthangliana chuan, IHIP chu hri léng leh natna hluar tur vènna kawngah a hun taka hmalaktir theitu tur a nih thu sawiin, "IHIP hi a ṭangkai hle dawn a, ṭha taka kan kalpui chuan hriselna lama hmalakna tur duan nan pawh nasa takin min pui dawn a ni," a ti a; a nihna ang taka hman ṭangkai a nih theih nan sub-centre aṭanga medical college thlengin thâ thlah loa ṭan la turin thawktute a chah.

IHIP-ah hian system ngai tho hmangin portal thar hman a ni dawn a, natna chi hrang 46 leh syndrome leh symtom 26 report tel theih a ni ang. Report chu kar tina ti tawh loin, natna hrang hrangte chu ni tin sorkar laipuiah portal hmangin hriattir a ni tawh dawn a, natna report-te chu an khaw hming en nghal zung zung theih a ni tawh dawn a ni.