MIPUI PHUNCHIARNA LEH SORKAR MANGANNA
MIPUI PHUNCHIARNA:
Kum hmasa lama CoviD hripuiin India ram min rawn luhchilh ve takah khan kan State Chief Minister zahawm tak hian CoviD beihletna atan chuan in mamawh zah zah sum rawn dil rawh u, a awm zel ang a lo ti nain CoviD hripuiin min han luhchilh lehzual tak takah meuh chuan sum mamawhna a lo lian zel mai si a. Kan CM berin CoviD beihletna atan sum a tam a, in duh zah zah rawn dil rawh u a tih kha chu a dik chiah lo nge ni, CoviD beihletna atan May 23, 2020-ah kan CM zahawm tak chuan CoviD hripuiin sum harsatna namen lo a thlen vangin Mizoram sorkar chuan sorkar hnathawkte hlawh a puk (bat) ṭhensak tur thu a sawi ta mai a. Hei hi thlabi hlawh (gross salary) aṭangin Group – A te 15%, Group – B te 10% leh Group C leh D te 5%-a June – August thla chhung, thla thum chhunga puksak a ni dawn a, sorkarin sum a neih huna a pung awm loa rulh leh tur a ni a, hetah hian Health leh Home Department-te erawh puksak an ni ve dawn lo niin a sawi a. Heng sum puk tur zawng zawng zat hi Vaibelchhe 90 tling tura ngaih a ni. Heng bakah hian kumin 2020 chhungah khan Mizoram sorkarin Reserve Bank of India (RBI) aṭangin ṭum 10 sum puk tawh a ni a, hengte hi a vaiin Vaibelchhe 208.18 a ni.
Heng bakah hian kan sorkar hian Chief Minister Relief Fund tih awmsa chu CoviD beihletna atana sum bawm pui berah hmang chho nghalin mi tlawmngai leh pawl hrang hrangte’n sum an thawhkhawm a, nimahsela chu sum tlingkhawm aṭang chuan kan sorkarin hetiang hian a han hmang bawk a;
1. Pamphlet siam nan Rs. 9,00,000 (Nuaih kua). Hei hi a hma khan Cheng Nuaih 1,053,000 tih a ni nain tihdanglam leh a ni.
2. Truenat (Truelab Quottro Realtime Quantative Micro PCR Machine) sawm (10) leh a ken tel leina Rs. 3,19,83,830/-
3. Directorate of Hospital & Medical Education leh Aizawl leh Kolasib DC-te hman atan - Rs. 1,40,42,000/-
4. RAT Kit Sing hnih (20,000) leina - Rs. 1,40,29,000/-
5. Re-agents & consumables for Rt-PCR – Rs. 13,23,463
6. Works – Rs. 14,27,670
7. Diet for ZMC Quarantine staff – Rs. 23,20,975
8. Mobility support – Rs. 8,00,000
9. Wages – Rs. 5,00,000
Heng bakah hian Truenat atan CMRF aṭangin Rs. 1,00,00,000/- pek chhuah a ni tawh bawk (Hengte hi Congress Party P. R leh chanchinbu aṭanga kan hmuh theih chin a ni). CM Relief Fund chu sorkar bungrua leh khawl lei nan te, Department leh DC-te hman atan te, RAT Kit lei nante hman a ni ta daih a. Hetianga sorkar insensona tura ngaihah hian CM Relief Fund cheng Vaibelchhe 6 chuang zet hman ral ni tawha hriat a ni. Tunah hian CMRF-ah hman miah loh cheng 1,33,34,984 a la awm niin May 6 Mizo Aw Editorial chuan a rawn sawi bawk a.
Hetianga CMRF sum leh pai a ni loa hman a nih vang hian nge ni ṭhenkhatte chuan sum thawh an hreh phahin thawh tawh loh tumte pawh an awm hman a. Heng bakah hian Contract hna pek chawl chuang lo te, ṭul mang loa sum luangrual awm reng leh SEDP Board 14 hi ṭhiah ni rawh se te an ti hialin, PAHOSS pawh mi hausate hnenah pein Vaibelchhe tam tak hman a ni bawk an ti a. Hetiangte a nih vang hian mipui lam aṭangin phunnawina a tam phah a, nakin hnu zelah pawh hian harsatna kan la tawh phah theih a hlauhawm a ni.
SORKAR MANGANNA:
Kan Health Minister berin May 4, 2021 niah chuan hripui chu vantlangah a ṭaidarh tawh thu leh a him bik pawh sawi harsa a nih thu a sawiin, hetiang zela kan kal a nih chuan intuamhlawmna lamah harsatna kan la tawh thuai a hlauhawm thu a sawi bawk a. March thlaa positive 53 hmuhchhuah a nih laiin April thlaah chuan 1656 lai positive hmuhchhuah a ni a, tun May thla ni 1 -5 chhung ngawt pawh khan Positive 850 kan nei hman a ni. Hetianga positive kan lo pun chak tak avang hian April 30, 2021 khan Chief Secretary chuan random test nei turin H&FW Department chu a hriattir a, Siahaah chuan May 3 khan random test hi neih a niin mi 30 positive hmuhchhuah a ni a, hetiang bawk hian Champhaiah pawh random test hi neih a ni. Nimahsela, hetianga random test kalpui mek a nih lai hian community spread hi a awm ngei a ni tih a chian tawh avangin random testing neih mek chu tihchhunzawm ṭulna a awm tawh lo tiin May 4 khan H&FW Department chuan thuchhuah a rawn nei leh ta a.
Hetiang hian kan sorkar lam hruaitute’n zah pawh dawn loa kan dinhmun chhiatzia an rawn puang ṭan ta hial a, hri vei khung hrante ngei ngei pawhin an ei leh in man an intum a ngai tawh bawk a, tunah phei chuan Oxygen hman man thlenga chawi a lo ngai ta bawk nen hian kan sorkar sum leh pai dinhmun hi a ṭha lo hlein a ngaih theih. Heng mai bakah hian sorkar hnathawk inzawmkhawm pawl FMGE&W hnenah sorkar chuan thawhlawm thawh tura ngenna a siam hialin anni hian May 6 khan Vanapa Hall ah meeting neiin an ngaihtuah bawk a.
CHUTICHUAN:
Kan sorkar lam pawh hian hetianga a mangang tak zet a nih chuan mipui lungawina turin inherrem ta mai se la, a theih dan danin sum pawh hrek deuhin tun boruakah chuan CoviD beihletna lamah insawrbing ta se la, mipui lam chu an phunnawi lo deuh mai thei e. CoviD vei hetianga kan pun chak em em mai bakah kan unau mi 17 laiin an nunna hlu tak an lo chàn tawhna hian sorkar leh mipui lamah ṭanrualna ṭha zawk min siamin thawhhona ṭha tak nen kan ral hlauhawm tak hi bei turin kan inbuatsaih a hun ta hle mai. Kan sum bawm lian ber CMRF ngei pawh hi a hming thlakin a enkawltu turte pawh pawl aiawh angte pawha inruat ni ta se la, thawhhona a ṭha zawk mai thei a ni.
Mahmuaka Chhakchhuak