Joshua rit titu a coach

Anthony Joshua coach Rob McCracken chuan a boxer leh world heavyweight champion ni bawk chu Joseph Parker nen an inhnek a hnaih tawh avangin a rihna tla hniam se a duh a, tun aia zang zawk a nih chuan hahdam taka inhnek a hmachhawn theih tur thu a sawi.

Kum 28 mi Joshua hi October-a Carlos Takam a hneh khan 18st 2lb (kg 115)-a rit a ni a, hun rei tak chhung Joshua lo kaihruai tawhtu McCracken chuan Parker a hmachhawn huna 17st 10lb (kg 112) nihtir hman ngei an tum thu sawiin an inbuatsaih nasa hle.

McCracken chuan, "Tuna kan tum ber chu a rang thei ang bera rihna tih hniam a ni a, a fight hnuhnung ber ai kha chuan tunah hi chuan tlem chuan a zia deuh tawh. Krismas hma khan London-ah kar li chhung training kan nei hman a, a dinhmun a ṭha a, a in fit a, tun hma aiin tlemin a che rang tawh bawk," tiin a boxer dinhmun a sawi.

WBA leh IBF heavyweight champion Joshua hi March thla tawp lama WBO champion Parker hmachhawn turin an inbuatsaih mek.