CORONAVIRUS HRI LENG VANGIN I ṬAWNGṬAI RUAL ANG U
He hnam hian invenna tur hmanraw ropui kan nei ve lo, kan hmanraw neih ropui ber chu, lungruala kan ṭawngṭai ṭhin hi a ni.
Tunah hian Sikim sorkar chuan Coronavirus avangin, foreigner tan, an ILP pek chhuah an khar tawh, India ramah he hri kai mi 29 hmuh chhuah an ni tawh, zirna in tam tak khar a ni tawh bawk. He hri leng hian kian lam aiin darh zau lam a pan zawk zel bawk si.
He hri leng hi kan ramah hian lo lut palh ta se, kan tuar hle ang. Kan hmanraw neih a indaih lo thuai ang a, ei tur nei lovin kan tam hma hle bawk ang. Chutiang dinhmun chu kan thlen ve lohna turin, kan inven theihna hmanraw ṭha tak chu, lungrual taka ṭawngṭaiho hi a ni. He hnam hian heng hunahte hian chung Pathian kan lo au eih tawh ṭhin asin.
Japan ral lianah khan: Indopui pahnihna kha Mizote tan pawh a hlauhawm khawp mai. British laka India zalenna sualtu, Subash Chandra Bose khan Japan a han pun a, Japan ral a rawn lian ta thut mai a.
Mizorama British sipai awmte kha an ropui lem lo, Japan ral a lo len vaih chuan, kan pi leh pute kha chu an hnungkhirh dial mai dawn a ni. An manganna chu chung Pathian ven theih a nih beiseiin, Aizawl Lammualah kan pi leh pute kha inko khawmin, van lam chhanna mak tak beiaseiin an ṭawngṭai ho va, an beiseih ngei kha an hmu chiang asin.
Japan ral chu a lo lian ngei a, Birtish sipai leh Lushai Scout ho khan, Japan ral hmatawng kha hneh takin an nawr kir a, an kawngṭum tidanglamin Manipur lamah an liam ta hum hum mai a ni. Chak takin an nawr zel a, Nagaland thleng rawkin an nawr a, British sipai pawh an thi tam ngang mai. Japan ram Hiroshima khawpuiah Atom bomb an thlak avang chauhvin, Japan ho chu an inhnukkir leh ta.
Khatiang ral hlauhawmah khan, kan pi leh pute khan, Pathian chhanhimna an lo chang tawh asin.
Harhna kan dil: Wales ram harhna kha Khasi hovin an dawng ve a, chu harhna chu kan pi leh pute khan chan ve beiseiin an zuk chhim a. Beidawngin an lo haw a, Chaltlang Bethel hmunah khian an beidawnna chu Pathian hnenah thlenin ṭawngṭai rual an nei a, an danglam ta tlat mai.
An zin report chu Mission Veng Biak In-ah an pe a, chhim lam hote thlahna hla saa, ban hla an sa chu le’h, an tawp thei ta reng reng lo, an mi thlah turte pawh an haw thei ta lo va. Harhna chuan ram pum a tuam a, harhna ṭum tam tak a thleng zui. Kum 1983 khan harhnain min kiansan rei tawh nia hriain, Synod inkhawmpui khan kum 1984 kha harhna dil kumah an puang a. He hnam hian lungruala Lalpa kan auh chuan, chhânin kan awm zel mai a ni. Kum pawh a vei hmain, harhna chuan ram pum a tuam leh ta. Lalpa chu kan au eih ngei asin.
Ram buai kan ning: India laka indan tumin Mizo sipai kan din a, mahse chakna lamah kan lo khan lo hle mai a, mipui nunaute nenlam min sawp ta hrep mai a. Kan hrehawmna kha a namai lo em a, Kohhran hruaitute lo thovin, remna zawngin ban an phar a. Curfew avanga Biak In rap thei mang lova kan awm lai khan, chung lamah bawk kan manganna kan thlen leh a, he hnam hian lungruala van Pathian kan auh chuan, Pathian hriat hnam kan nihzia a lo lang leh mai ṭhin. Tunah chuan India ram state azawnga state ralmuang ber kan lo ni ta a nih hi.
Thlipui kawng bo kha: Kum 2013 khan kan ramah hian thlipui na tak a lo tleh dawn tih mi thiamten an sawi a. Mi ram anga thli na tuar thei tur kan ni ve si lo. Mangangin van Pathian kan au leh ta a nih kha. A mak asin, kha thlipui kha a lo thawk ngei a, Mizoram a lo thlen dawn khan vansangah thlipui khan a kawng a bo ringawt zuk nia maw le! Hei hi dawt thu a ni lo tih a hretute kan ni e.
I ṭawngṭai ho ang u: He hnam himna hmanraw ṭha ber chu, lungruala kan ṭawngṭai ho a nih si chuan, Coronavirus lakah pawh kan him theihna chu, ṭawngṭai ho bawk hi a ni leh mai lawm ni? He hnam tlemte leh, hmanraw ṭha nei ve lo, intodelh bawk si lo hian, he hri leng hi tuar ve tlak kan kan ni mawlh lo.
Kan himna atan mai ni lo, a tuar ramte tana kan ṭawngṭai ho pawh hi, kan tih ve tur a ni dawn lawm ni?