KṬP Kumpuan Film HNEHTU a hmuhnawm

KṬP Kumpuan 2020-2021 Film HNEHTU chu Inrinni zanah khan Central KṬP YouTube channel leh Hruaina Eng channel-ah tihchhuah a ni ta a, social media lama 'reaction' hrang hrang aṭangin thlirtute'n hmuhnawm an ti hle tih a hriat.

KṬP Kumpuan (2020-2021) thupui 'Pathian Hnaih' behchhana siam film hi a hmuhnawm a, a changtute an ṭhain an chang thiam bawk a, en a manhlain rilru pawh a hneh hle.

Mizo film siam lama sulhnu nei ṭha tak Lalnunsiama (One Vision Gospel Media) direct a ni bawk a, beisei ang ngeiin a hmuhnawm a, entute rilru pawh a hneh viau ang tih a rinawm. Film budget a tlem lo tih hriat takin engkim mai uluk taka chan a ni a, Mizo film tam taka hmuh tur awm ṭhin, awm ang lo leh lutuk leh lem deuha thil thleng han sawi tur a awm meuh lo.

Script a ṭha a, a ziaktu H Zosangliana'n fak a phu hle. Chutih rual chuan, a bikin a tir lamah, 'scene' ṭhenkhat 'boring' lek lek hmuh tur a awm leh zauh ṭhin erawh duhthu sam lo lai sawi tur tlemte zinga mi a ni ang.

'Scene' hlimawm hmuh tur a awm zeuh khan film en a tinuam zual. Ruihhlo bawiha tangte leh sualna vanga lungngai mek, talchhuahna kawng zawngtute tan erawh en ngei ngei tur a ni. Mi tam tak rilru a hneh dawn tih a chiang a, hnuk no deuh tan phei chuan mittui han hruk fap fapna tur laite pawh a awm.

A changtute an chang thiam tlangpui a, a bik takin Papuia Pachuau-in fak a phu. 'Comedy' lamah chuan a ṭha tih kan hre vek tawh a, 'comedy' mai ni loah pawh a lo chang thiam tak zet. Khawngaihthlak takin a chang thiam a, ruihhlo hneh tuma a beih dan 'scene' phei chu a tak emaw tih mai tur khawpin a chang thiam.

Pawisa tam tham tak an seng chunga a thlawna en theih tura 'YouTube' lama chhawp chhuah a ni hi Central KṬP lam pawh an fakawm hle a, kumina Mizo film chhuak zinga hmuhnawm ber pawl 'Hnehtu' hi i en duh a ni chuan Central KṬP YouTube channel lamah a thlawnin duh hun hunah a hmeh chhuah theih reng tawh e.