Khawpui fai inelna atan inbuatsaih

Urban Development & Proverty Alleviation (UDPA) buatsaihin, Inrinni zing khan Mamit Bazar Vengah khawpui fai inelna atana inbuatsaihna atan, 'Awarness campaign on Cleanliness Competition for Urban, Mizoram 2018' hman a ni a, Mamit additional DC Jacob Lalawmpuia'n a hmanpui.

Jacob Lalawmpuia chuan, Mamit khawpui chu khawtlang, mipui leh department hrang hrangte ṭanrualna zarah kum hmasaah Mizoram khawpui fai inelnaah lawmman pakhatna a lak thu a sawi a, "Kuminah pawh lawmman la ngei thei tura kan thawhho a ṭul leh dawn. Fai turin hausak emaw, lehkhathiam emaw mi bik nih a ngai lo a, tu pawhin fai turin theihna kan nei a ni," a ti.

Inkhawm hi UDPA officer HD Lalpekmawia'n a kaihruai a; Mamit sub.hqrs. YMA, Joint V/C, MHIP sub.hqrs. aiawhte'n khawtlang, mimal leh pawl hrang hrangte tana hmalakna tur an sawi.

Khawpui fai inelna pual hian Mamit khawpui veng hrang hrangte tana vengfai inelna quarterly-a buatsaih ṭhin a ni a, inkhawmah hian a ti ṭhate hnenah lawmman sem a ni.