Arteta enkawl Arsenal-in hma an sawn
Arsenal chuan Mikel Arteta kaihhruaina hnuaiah team an indin chho mek zel. Premier League match an khelh hnuhnung pahnihah goal chhuah loin hnehna an chang ve ve - Inrinni zan khan khualmualah an chunga awm Wolves 2-0 in an hneh.
Molineux Stadium-a inkhelah Gunners tan rawlthar Bukayo Saka chuan a league goal hmasa ber a khung, wing back Kieran Tierney-a ball cross an dan per chu box chhunga vengtu nei lo English rawlthar hian a volley lut.
Gunners tlarhnung an inremphui ṭha a, Wolves tan Adama Traore-a'n hun ṭha nei mah se keeper Emiliano Martínez a chip khum chu goal chungah a kal. Substitute Joe Willock siamsak chu Alexandre Lacazette chuan hnai tak aṭangin chak nemngheh nan a khung.
Hmasawnna
Covid-19 len hnua an match hmasa lamah Arsenal hian Manchester City leh Brighton an hneh lo, a hnu lamah erawh Southampton, Norwich City leh Wolves an hneh; FA Cup semifinal lut turin Sheffield United an ngam bawk - a
zawnin match li chhung hnehna an chang ta.
North London club hian Bukayo Saka leh Gabriel Martinelli te hun rei zawk cham turin contract an ziahpui hlim a ni a, manager Arteta kaihhruaina hnuaiah season tharah pawh hmun pawimawh an chan chhunzawm ang.
England Under-19 international Saka chuan, "Contract thar bakah Premier League goal hmasa ber khung kar a ni, ka tan chuan chawlhkar hriatreng tur a ni. Dawhthei leh rim takin ka inzir chhunzawm ang," a ti. Season hmasa khan league match khat a khel a, tun season-ah erawh vawi 22 a inlan tling tawh.
Hmabak hautak
Arsenal hian July 8, Nilaini zanah an chunga awm Leicester City an mikhual zui dawn a, chumi hnuah an hmelma Tottenham leh champion Liverpool an hmachhawn dawn; FA Cup semifinal-ah Man City chuan an lo hmuak bawk.
Table-a pasarihna Gunners hian chhiarkawp dan chuan season thara Champions League an khelh theih dan a la awm, chutihrualin an hmabak thlir chuan a hautak hle dawn tih a chiang, hun pawimawh laia an 'ruhno' ṭhin kha a puitlin a ngai tawh ang.
Chak lo mah se Wolves hi parukna an la ni, an ngam loh Arsenal aiin point thumin an la sang zawk. Nuno Espirito Santo naute hian theihna an nei tih chu a chiang tawh a, an hmabaka awm Sheffield United leh Everton lakah hnehna an chang thei a nih chuan European football an khelh chhunzawm theih a rinawm.
July 4, Inrinni
Norwich City 0 - 1 Brighton & Hove Albion
BRI : Leandro Trossard 25'
Leicester City 3 - 0 Crystal Palace
LEI : Kelechi Iheanacho 49'; Jamie Vardy 77', 90+4'
Manchester United 5 - 2 AFC Bournemouth
MAN : Mason Greenwood 29', 54'; Marcus Rashford 35' (P);
Anthony Martial 45+2'; Bruno Fernandes 59'
BOU : Junior Stanislas 16'; Joshua King 49' (P)
Wolverhampton Wanderers 0 - 2 Arsenal
ARS : Bukayo Saka 43'; Alexandre Lacazette 86'
Chelsea 3 - 0 Watford
CHE : Olivier Giroud 28'; Willian 43' (P); Ross Barkley 90+2'