Sharif leh a chhungten no-fly list aṭanga paih ngen

Pakistan Prime Minister hlui Nawaz Sharif leh a fanu, Maryam leh a makpa Capt(retd) Muhammad Safdar-te chuan Interior Ministry hnenah an ram chhuahsan khapsak, no-fly list aṭanga an hming paihsak turin an ngen.

Pakistan sorkar thar, Prime Minister Imran Khan kaihhruai chuan eiruk dona beihpui a kalpuina peng pakhatah Sharif leh a fanute nupa hi an ram chhuahsan khapsak zingah a telh a ni. An pathum hian eiruk thubuaiah thiam loh chantirin man an ni tawh a, mahse Islamabad High Court chuan an hremna pek hi a hnawlsak hnuah jail aṭang hian chhuahtir an ni leh tawh a ni.

Sharif-a leh a fanute nupa jail-a an tantir lai hian sorkar chuan an pathum hian Pakistan ram chhuahsan khapsak, Exit Control Lists (ECL)-ah a telh a ni. Mahse an pathum hian Interior ministry hnenah hian a hrana ngenna thehlut ṭheuhin, eng institution mahin list-a telh tur hian thupek an tihchhuah loh avangin ECL aṭanga an hming paih tur hian an ngen a ni. ECL-a an hming telh a nih dan chu an ram danpuia Article 4,15 leh 25 kalh a ni tih sawiin, sorkar thiltih dan chu dan kalh a ni, an ti. National Accountability Bureau (NAB) chuan eirua an puhna chungchangah finfiahna a nei thei lo niin an sawi bawk.

Ministry-a lehkha an thehluhah Sharif chhungkua chu dan zawmtu leh ngaihpawimawh chhungkua an ni tih sawiin, accountability court judge-in an thubuaia thiam loh chantir a nih thu a puan hnuah thuneitute kutah anmahni ngei an inpe tih an sawi. Court hearing-ah pawh ṭha taka an tel zel thu an sawi bawk a ni.