AP gun surrender campaign entawn turin state dangte duh

Union minister for environment, forest and climate change Bhupender Yadav chuan Arunachal Pradesh sorkarin nungcha humhalhna kawnga hmalakna, 'Airgun Surrender Abhiyan' asiam chu state dangte pawhin entawn se a duh thu a sawi.

Pathiannia Pakke Kessang district-a Pakke Tiger Reserve-a campaign neihnaah Union Minister hian a telpui a, he hmalakna hi ṭha a ti hle tih a twitter lamah a sawi zui nghal a ni.

Minister Yadav chuan Air Gun Surrender campaign neih ṭan a nih aṭanga kum khat chhungin Arunachal Pradesh-ah hian sapel bansan tura intiam a, sorkar hnena air gun thehluh 2,200 chuang a awm hman tih a sawi. Pathiannia hun hmanah pawh airgun 80 chuang chu thehluh a ni leh bawk.

Airgun Surrender Campaign hi state environment and forest department-in sapel bansan tur leh, nungcha humhalhna kawnga state mipuite zirtirna tura a kalpui niin, forest and environment minister Mama Natung kaihhruaina hnuaiah chak takin hma an la a ni.