Lungalhthei indaih lohna thleng mek avangin khualzin phur rel 424 cancel belh leh

Ram chhunga power plant hrang hranga lungalhthei indaih lohna thleng mekah, lungalhthei phurte rang zawka an tlan theihna turin Indian Railways chuan khualzin phur rel 424 a cancel belh leh. Kar liam ta khan khualzin phur leh mail train 657 cancel a lo ni tawh a ni.

Indian Railways hian May 24 thleng atan khualzin phur rel leh mail train 1,081 te chu a titawp rih a ni. Hetih lai hian power plant hrang hrang tana lungalhthei phur tur hian a open wagon 86% a tlantir bawk.

Coal leh power ministry-te nena an inbiakrawn hnuah, Railways hian BOXN/open wagon 1,31, 403 zinga 1,13,880 chu lungalhthei phurhna atan hian a hmang mek a ni.

Sorkar laipui pawhin lungalhthei indaih lohna avanga power lama harsatna thleng mek chinfel dan kawng a ngaihtuah reng a, imported coal-based project zawng zawngah dan pangngai anga power siamchhuah hna thawhna turin Electricity Act Section II a puang.

Electricty Act Section II hnuaiah hian sorkar chuan power siamtu company-te chu hna thawk a, an station tinte pawh an thupek anga kalpui turin a ti thei a ni. He order hi sorkar chuan Ningani khan a tichhuak.

India ramah ram pawn lam aṭanga lungalhthei lakluh hmanga plant siam aṭangin power hi MW 17,6000 vel siamchhuah a ni ṭhin a, mahse tun hnaiah lungalhthei lakluh man a to avang leh,chhawmdawlna an dawn loh avangin 10,000MW chauh siamchhuah a ni. Heng plant-te hian power leina tura inremna an lo siampui tawhte an pechhuak phawt ang a, a bak chuang a la awm chuan power exchange-ah an hralh thei dawn a ni. Exchange aṭang khan state-te chuan power hi an leichhawng ve leh thei ang.