Health centre-te thuam ṭha turin MLA-in Mizoram sorkar a ngen

Aizawl South-II bialtu MLA Lalchhuanthanga chuan nimin khan thuchhuah siamin, a bial chhunga health centre hrang hrangte’n hmanrua leh bungrua an neih ṭhat loh avangin thuam ṭha turin Mizoram sorkar a ngen.

Lalchhuanthanga chuan nimin khan a biala health care centre hrang hrang a tlawh tih sawiin, “Health department thuam chak a ṭulzia leh hmanrua an neih chhiatzia ka hmuhin, ka bial mipui an khawngaihthlâk hlein ka hria. Veng chhung level-a hriselna lama thawktute leh an hmanruate thuam chak a ngai hle a, hetiang kawngah hian chak zawka hma la turin Mizoram sorkar ka ngen a ni,” a ti.

Aizawl South-II MLA chuan, “Ka biala sub-centre leh clinic ṭhenkhatah phei chuan lapua leh bandage takngial pawh an lo nei lo a, min barakhaih hle zawk a ni,” a ti a; thawktute’n mamawh an ngah a, an mamawh ṭhenkhat phei chuan ngaihtuahna a tithui hle tih a sawi.

Hetih lai hian Lalchhuanthanga chuan, a bial chhunga awm Kulikawn Hospital, health clinic panga leh sub-centre pangaah an mamawh zualpui eng emaw zat MLA fund aṭangin a pe tih sawiin, “An mamawh dangte pawh kan la ngaihtuah zel dawn a ni,” a ti.